Policia e Tiranës ka arrestuar një të ri i cili akuzohet për dy raste të ngacmimeve seksuale.
Uniformat blu bëjnë me dije se është arrestuar 25-vjeçari me iniciale Xh.B, i cili dyshohet se në rastin e parë ka ngacmuar një vajzë të mitur në ashensor. Kurse në rastin e dytë, i riu akuzohet se ka ngacmuar një shtetase të huaj në parkingun e një qendre tregtare.
Gjithashtu polica njofton se gjatë arrestimit 25-vjeçarit i është gjetur edhe një sasi kanabisi.
“Ngacmoi seksualisht dy shtetase, identifikohet dhe vihet në pranga 25-vjeçari. Specialistët për Hetimin e Krimeve të Komisariatit të Policisë Nr. 1, në vijim të punës për goditjen e paligjshmërisë në çdo formë të saj, pas kallëzimit të bërë nga një shtetase e mitur 15 vjeçe, se një shtetas i paidentifikuar e kishte ngacmuar atë seksualisht, në ashensorin e pallatit ku ajo banon, menjëherë kanë organizuar punën dhe kanë finalizuar operacionin policor të koduar “HARASSMENT”.
Si rezultat i tij u bë arrestimi i shtetasit Xh. B., 25 vjeç, banues në Tiranë. Nga veprimet hetimore ka rezultuar se 25-vjeçari ka ngacmuar seksualisht 15-vjeçaren, në ashensorin e pallatit, si dhe një shtetase të huaj, në parkingun e një qendre tregtare”, njofton policia.
Gjatë kontrollit fizik, shërbimet e Policisë i gjetën 25-vjeçarit, një sasi lënde të dyshuar narkotike kanabis, e cila u sekuestrua në cilësinë e provës materiale. Materialet i kaluan Prokurorisë, për veprime të mëtejshme procedurale.
