Kreu i IMT-së në Bashkinë e Tiranës ka qenë ditën e djeshme në qendër të vëmendjes së Belind Këlliçit, i cili ka zbuluar skemën përmes së cilës Mariglen Qato së bashku me familjarët e tij ka përfituar 25 milionë euro nga tenderat dhe leje ndërtimi të dhëna nga Erion Veliaj.
Qato ka shfrytëzuar pozicionin e tij në kupolën e administrates për t’u pasuruara frikshëm nën menaxhimin e bashkisë prej Veliajt, me kompaninë “5D” që është në qendër të skemës dhe zotërohet “de facto” prej drejtorit të IMT-së.
Kandidati i koalicionit “Bashkë Fitojmë” vazhdoi me denoncimet për Qaton edhe në mbrëmje teksa ishte i ftuar në “Ora e Betit”.
Ai zbërtheu skandalin me lidhjet nepotike dhe korruptive në bashkinë e Tiranës, që çojnë paratë e taksapaguesve në duart e një grupi të caktuar individësh, duke bërë me dije se treshja titullare që kanë drejtuar dikur UKT dhe kanë lënë Tiranën pa ujë, po ndërtojnë një hotel me vlerë 15 milionë euro në Durrës.
“Hoteli 15 milionë euro po ndërtohet në Durrës dhe bëhet fjalë për një treshe që dikur ka drejtuar UKT. Tre titullarë të UKT që kanë lënë Tiranën pa ujë. Veliaj në studion e televizionit tuaj ka thënë në 2015 që Tirana brenda 2022 do të kishte ujë me kualitetin e Korçës dhe çmimin e Bathores. Ujë qytetarët nuk kanë. Qytetarët nuk kanë 24 orë në muaj ujë. Titullarët e UKT janë ndërtues, biznesmenë, ndërtojnë hotele 15 milionë euro. Hapin kompani, ua japin familjarëve të tyre, familjarët e tyre i kanë drejtorë financash në UKT, i kanë të punësuar në bashkinë qendrore, kontrollojnë fondet. Mariglen Qato ka marrë 29 tendera. Ky drejtor i bashkisë Tiranë 10 tendera i ka marrë nga UKT ku ka qenë drejtues vetë, ndërsa nga bashkia Tiranë ka marrë 15 tendera të tjerë. Së bashku bëjnë 20 milionë euro. Do t’i dërgoj në SPAK dhe pse nuk kam shpresë”, tha Këlliçi.
Këlliçi sqaroi se Qato së bashku me Redi Mollën dhe Elvin Tivarin në datë 8 Nëntor 2022 kanë marrë lejen e ndërtimit për hotelin në bregdet.
“Dua të ndalem te ‘qershia mbi tortë’. Është ky hotel me vlerën 15 milionë euro, vetëm një sekondë me vëmendje ju lutem, 15 milionë euro me sipërmarrës ‘Mediterrinan Investment Group’ dhe subjekt ndërtues 5 drejtorët e Bashkisë, ‘5D’ të cilat ky individ së bashku me Redi Mollën dhe Elvin Tivarin, dy bashkëpunëtorët e tij të ngushtë dikur në UKT dhe tashmë ata janë punonjës të ‘Tirana DC’ dhe të lidhur me Bashkinë e Tiranës këta zotërinjtë sot ndërtojnë hotele në vlerën 15 milionë euro”, nënvizoi Këlliçi.
LEXO EDHE:
Kreu i INUV Mariglen Qato, 25 milion euro tendera dhe leje ndërtimi nga Veliaj
