Sekretari i përgjithshëm i Organizatës së Kombeve të Bashkuara, Guterres paralajmëroi sot kundër rrezikut për të hyrë si ”somnambul në një luftë”, në rastin e Koresë së Veriut, duke bërë thirrje për t’i lënë vend diplomacisë.
“Gjëja më e keqe që mund të ndodhë do të ishte që ne të hyjmë somnambul në një luftë që mund të ketë pasoja dramatike”, deklaroi ai me rastin e një vizite në Tokio.
Këshilli i Sigurimit i OKB-së ka miratuar një seri sanksionesh për të bindur vendin e izoluar nga pjesa tjetër e botës për të hequr dorë nga programet e tij të ndaluara balistike dhe bërthamore.
‘Këto sanksione duhet të respektohen nga Koreja e Veriut në radhë të parë, por gjithashtu të vihen plotësisht në zbatim nga të gjithë shtetet e tjera, ku roli i tyre është vendimtar për arritjen e denuklearizimit në gadishullin korean”, deklaroi Guterres.
“Uniteti i Këshillit të Sigurimit është thelbësor. Por është po aq e rëndësishme mundësia e kontakteve diplomatike që lejojnë që denuklearizimi të bëhet në mënyrë paqësore”, u shpreh ai gjatë një takimi me kryeministrin japonez, Shinzo Abe.
