Kryetari i Partisë Demokratike, Sali Berisha zbuloi këtë të Martë një sondazh të opozitës lidhur me Tiranën, në prag të lokaleve të 14 Majit.
“Kemi sondazhe të shkëlqyera, po them vetëm një: 67 përqind e qytetarëve të Tiranës, Veliajn e quajnë gënjeshtar, 65 përqind fals, 63 përqind të korruptuar. Ky është sondazhi”, u shpreh Berisha në një emision televiziv.
I pyetur sa në sa bashki mendon se kandidatët e koalicionit opozitar dalin fitues, Berisha tha: “E kam të vështirë të them për ndonjë që s’mund të marrim. Numra s’them kurrë. Në të gjitha baskitë që kam vizituar kam gjetur kandidatë të fitores, kështu ka qenë në 1992-in dhe tani”.
Kryedemokrati vlerësoi fushatën e kandidatit të opozitës për Bashkinë e Tiranës Belind Këlliçi si dhe të kandidatëve për Elbasanin – Luçiano Boçi dhe Durrësit – Ilgi Cara.
“Unë mendoj se fushata në dy qytetet ngjitur me Tiranën, Durrës dhe Elbasan, shënon suksese shumë të mëdha, jemi të sigurt në fitoren e tyre. Këtë po e ndjen dhe Edi Rama dhe është shumë i tronditur. Edhe unë i ndjek me një admirim daljet e tyre televizive dhe fushatën që bëjnë, kanë fituar zemrat e qytetarëve, janë kandidatët e tyre”, tha Berisha.
Po ashtu, ai u shpreh i sigurt në fitoren e Bardh Spahisë në Shkodër.
Sipas Berishës, pas disfatës që Rama do të pësojë në zgjedhjet lokale, “pas 14 Majit do të largohet me zgjedhje kur të duam ne”.
Ai paralajmëroi se nëse “Rama kryen megakrim elektoral, do ketë megapërgjigje”.
