Një sherr i ndodhur në një qebaptore në Reeperbahn, lagjia St. Pauli e qytetit gjerman Hamburg në orët e para të mëngjesit, ka përfunduar me plagosjen e një shqiptari, i cili ndodhet në rrezik për jetën.
Sipas mediave gjermane së bashku me dy-tre persona të tjerë, ai hyri në qebaptore dhe nisën të flasin me njëri-tjetrin, por biseda u përshkallëzua brenda pak minutash dhe shpërtheu një debat.
Gjatë kësaj kohe, një prej personave me sa duket ka nxjerrë një armë dhe ka tërhequr këmbëzën të paktën një herë.
Viktima është goditur në stomak dhe është rrëzuar me plagë të rrezikshme për jetën. Ai u dërgua në klinikën “Saint George”, ku iu nënshtrua një operacion urgjent.
Kamerierët i kanë thënë policisë se i plagosuri, identiteti i të cilit ende nuk dihet është plagosur me një plumb në stomak dhe më pas ka rënë në tokë. Autorët kanë hipur në një “Audi” të zi që ishte parkuar dhe janë larguar pa mundur të zbulohen.
Policia është në kërkim të personave dhe po ashtu ka kontrolluar vendin e krimit për të dhëna të vlefshme, ndërsa dyshimet për sherrin lidhen me mosmarrëveshjet për tregun e drogës, që janë ndezur në këtë zonë për javë të tëra.
