Kandidati i opozitës për Bashkinë Kamëz, Arjan Hoxha ka hedhur akuza në drejtim të kryebashkiakut aktual Rakip Suli, se ka aktivizuar administratën dhe punonjësit e institucioneve shtetërore për të ushtruar presion ndaj qytetarëve për vota në zgjedhjet e 14 majit.
Hoxha për SyriTV ka denoncuar edhe zhvendosjen e votueseve përveç intimidimit të qytetarëve duke u marrë kartat e identitetit.
“Këto problematika vazhdojnë të jenë ekzistuese. Kemi disa individë që vazhdojnë të mbledhin karta identiteti nën presionin politik të kryebashkiakut në ikje, sepse në datë 14 maj ai do të jetë në pension politik. Pasi asnjë votues i Kamzës nuk bie pre e intimidimit dhe presionit të pushtetit lokal dhe qendror, si OSHEE, ZRPP apo punonjës të tatimeve që vijnë çdo ditë në banesat e qytetarëve për t’i intimiduar dhe joshur për të ceduar vullnetin e tyre në datë 14 maj”, tha ai.
Më tej Hoxha është shprehur se socialistët po tentojnë t’i hedhin baltë figurës së tij, por kjo nuk do t’i ndalë denoncimet dhe tentativat për blerje votash.
“Gjithë sulmi i makinerisë propagandistike po hedh baltë mbi kandidaturën time dhe mbi demokratët e vërtetë, por edhe aleatët tanë, por e kanë të kotë çdo veprim të tillë. Kemi denoncuar dhe ndjekur disa raste ku këta janë të vendosur në disa pika si me shpërndarjen e pakove ushqimore si me mbledhjen e kartave ID kundrejt pagesës apo edhe me legalizimet”, u shpreh Hoxha.
