Kandidati për deputet i PD-së, Arjan Hoxha ka folur ditën e sotme lidhur me krimin e organizuar dhe Policinë e Shtetit.
Hoxha ka deklarur në intervistën për Syri Tv se lidhjet e grupeve të krimit të organizuar arrijnë deri aty sa të emërojnë efektivë në Policinë e Shtetit. Ai u shpreh se një pjesë dërrmuese e drejtuesve policorë kanë lidhur më krimin e organizuar.
Ndërkohë më tej, Hoxha tha se politika ka ndërhyrë në çdo qelizë të Policisë së Shtetit dhe tha se kjo ndërhyrje ul dhe parametrat e sigurisë në vend. Ai komentoi aksionin e prishjes së ndërtimeve pa leje, ku tha se nëse politika nuk do t’i kishte lejuar, policia nuk do të përdorej për tu përballur me qytetarët për këtë çështje.
“Elbasani është një nyje e rëndësishme ku operojnë grupet e rëndësishme të krimit të organizuar me ndikim kombëtar e ndërkombëtar. Organizatat kriminale të trafikut ndërkombëtar të drogës, kanë lidhje të forta politike, ku arrijnë deri sa të nxjerrin me 20 e ca mijë vota një deputet apo deputete në parlamentin shqiptar.
Kjo ka ndodhur edhe në zgjedhjet e kaluara, pra nuk është se është vetëm tani, është në mënyrë permanente dhe absolutisht ndikimi, lidhjet e tyre dhe mundësia që ata të emërojnë drejtues të tillë në policinë vendore. Pra, kanë akumuluar një ekonomi në duart e tyre nga aktiviteti i tyre kriminal. Është e parashikuar në ligj: nëse ke vetëm kontakte me pjesëtarët e krimit të organizuar, ti nuk mund të marrësh çertifikatë sigurie.
Për fat të keq në Policinë e Shtetit, një pjesë dërrmuese e drejtuesve kanë lidhje me krimin e organizuar. Nuk mund të kërkojmë përmirësim të sigurisë publike, apo goditje të krimit kur kemi drejtues të tillë në policinë e shtetit. Konkursi për policinë ishte totalisht politik. Politika ndërhyn në çdo qelizë të Policisë së Shtetit. Ka humbur besueshmëria e publikut të drejtuesit e policisë. Politika sa më tepër ndërhyn aq më tepër ul parametrat e sigurisë në vend. Nëse politika nuk do të kishte lejuar ndërtimet pa leje, nuk do të përdorej policia si mashë për t’i goditur këto ndërtime”, tha Hoxha.
