Deklarata e sotme për mediat e kreut të Partisë së Lirisë, Ilir Meta u pasua nga disa pyetje të gazetarëve, ku më me rëndësi ishte interpretimi i tij për vendimin e KQZ e më pas KAS e Kolegjit Zgjedhor për të rrëzuar kërkesën për vendosjen e emrit të Sali Berishës si drejtues i koalicionit “Bashkë Fitojmë”.
Në gjykimin e Metës kjo është pjesë e lojërave të Edi Ramës, por nuk do të ketë asnjë ndikim tek votuesit.
“Zero ndikim tek votuesit, lojërat që bën Edi Rama në panikun e humbjes së rëndë që e pret në 14 maj me cic-mice të tilla që turpërojnë Kolegjin Zgjedhor dhe çdo institucioni që pretendon se është i pavarur. Është zgjedhje e forcave politike që përbëjnë koalicionin që të paraqiten me një emër apo jo dhe po kështu mund të jetë dhe duhet të jetë emri në rast se është e domosdoshme”, tha Meta.
Më tej ai shtoi se kryeministri është në hall të madh pasi nuk ka kandidatët e duhur përballë emrave të dalë nga “Primaret”, të cilët tregojnë integritet e dinjitet dhe për më tepër gëzojnë respekt në qytetet ku kandidojnë.
“Këto lojëra nuk ka qytetarë të Tiranës dhe Shqipërisë që nuk e kupton hallin e madh që ka gjetur Ramën. Ai nuk ka kandidatë përballë kandidatëve tanë, ka ca kukulla të stërprovuara, stërkonusmuara, që kanë firmosur për të vjedhur e ndarë plaçkën e pushtetit vendor, bashkë me Ramën, një pjesë prej tyre i ka çuar nëpër burgje se nuk i mbante dot, ca të tjerë kanë dhënë dorëheqjen e të tjerë presin radhën për të shkuar atje ku e kanë vendin shpërdoruesit e taksave dhe ligjeve”, deklaroi Meta.
