Kamza është cilësuar si bastion i djathtë, edhe pse në këto zgjedhje rivaliteti do të jetë i madh, me Rakip Sulin që kërkon mandatin e tij të dytë në krye të qytetit.
Varfëria është një prej problemeve më të mëdha të banorëve, që shprehen se pushteti vendor nuk ka bërë asgjë për ta, ndërsa denoncojnë heqjen e ndihmës ekonomike.
Të lodhur nga kostot e jetesës së përditshme, qytetarët shprehen se nuk e gjejnë shpresën te asnjë prej kandidatëve që të mund të ndryshojë gjendjen e tyre.
Shumica e të pyeturve, pensionistë, shprehen se nuk kanë mundësi që të blejnë ushqimet bazike që i duhen një familje për të jetuar.
“Unë po flas vetëm për familjen time, kam 4 fëmijë jetima, rri në një shtëpi me qera që ma kanë lënë për gjynah, kryetari i bashkisë as në zyrë nuk më ka qas, ndihmën ekonomike ma kanë hequr, se nuk kap pikët më kanë thënë. Fëmijët janë 19, 17 dhe dy binjakë 12 vjeç. Dy prej tyre i kam në jetimore, dy të tjerët janë te dajat, nuk më kanë dhënë asgjë”, shpreh shqetësimin një prej qytetarëve.
“Rrëmuja na shqetëson, shumë papastërti, asgjë nuk është bërë në këto vite, veç kanë ngrënë ata të mëdhenjtë, njerëzit më të pashpresë në këtë vend janë”.
“Çmimet na shqetësojnë shumë, skemi besim fare te premtimet që bëjnë. Shumë pak është bërë për qytetarët, kërkojmë të ulen çmimet, as sallatë nuk kam marrë, skam me çfarë i marrë”.
“Gjendja ekonomike është bërnut, të na rrojnë qeveritarët se ata hanë mirë, vjedhin sa ju do qejfi, për ne kujtohet vetëm kur janë zgjedhjet. Duam dhe ne pensionistët një vend ku të rrimë, pensioni nuk na del as për kafe, për kokën e dy gocave, as kaq mish nuk kam marrë për Bajram, për kokën e dy gocave. Kur vjen fushata vijnë që të na gënjejnë, nuk do votoj fare në 14 Maj, po vjedhin, po vrasin, po presin, më keq se kaq nuk ka ku të shkojë. Turp të kenë ata që janë në krye, si Sali Berisha, si Edi Rama si Ilir Meta”.
