Pep Guardiola thotë se Reali i Madridit është skuadra që duhet mundur nëse Mançester Siti synon të fitojë Champions-in për herë të parë në histori. Pasi eliminuan kampionët e Gjermanisë, Bajernin e Mynihut, duke u kualifikuar në katër ekipet më të mira të Europës, blutë nuk kanë zgjidhje tjetër veçse të kalojnë kampionët në fuqi të Europës për t’u përballur më pas me fituesin e gjysmëfinales tjetër, derbit Milan-Inter.
Siti-Real është një finale e parakohshme, me dy ekipet që konsiderohen favoritet për të triumfuar në finalen e Stambollit më 10 qershor. Në letër anglezët janë favoritë, por eksperienca flet për fituesit rekordmenë të Ligës së Kampioneve.
Pasi e ka fituar kompeticionin 14 herë dhe ka arritur një dominim të paprecedentë gjatë dekadës së fundit, Reali është skuadra që të gjithë duhet të mundin sipas ish-trajnerit të Barcelonës.
Skuadra e Ançelotit i eliminoi “qytetarët” në gjysmëfinalen dramatike sezonin e shkuar dhe muajin e ardhshëm anglezët do të kenë mundësi për t’u hakmarrë.
“Unë mendoj se të gjitha klubet në botë mendojnë se nëse dëshironi të fitoni këtë kompeticion, duhet të mposhtni Realin e Madridit. Dikur ishte Barcelona, ndërsa tani është Reali”, tha Guardiola.
“Jam shumë i lumtur që jam në tri vite radhazi në gjysmëfinalet e Ligës së Kampionëve. Fitorja me rezultatin e përgjithshëm 4-1 kundër Bajernit nuk tregon se çfarë u pa në të dyja ndeshjet. Unë e di sa të fortë ata janë. Në këtë kompeticion vendosin detajet. Sigurisht që është sfiduese që të arrish tri herë radhazi në gjysmëfinalet e Ligës së Kampioneve. Jemi të sfilitur”, shtoi Pep, i cili është në garë për të fituar tre trofe deri në fund të sezonit.
Pas Çelsit dhe Mançester Junajtidit (të dyja nga 2006-‘07 deri në 2008-’09-ën), të mërkurën hyri në histori edhe Mançester Siti, që u bë skuadra e tretë angleze që kualifikohet në gjysmëfinalet e Champions-it në tri sezone radhazi.
