Rikthimi i pikëve që iu hoqën Juventusit përfundimisht apo përkohësisht, duket se do të jetë konkluzioni i mbledhjes së Këshillit të Garancisë në Komitetin Olimpik Italian.
Kërkesat që parashtrohen janë anulimi i plotë i vendimit për Juventusin, ose kthimi edhe njëherë për rigjykim.
Ndaj sipas mediave italiane, nuk duket se ka alternativa të tjera, duke bërë të pashmangshme ndryshimin përsëri të renditjes së Serisë A.
“Në këtë pikë duket praktikisht e pamundur që Këshilli të refuzojë në tërësi apelimin bardhezi. Alternativat që diskutohen janë pranimi i tij dhe kthimi përfundimtar i 15 pikëve, apo rikthimi për gjykim, me kthimin për momentin të të gjithë pikëve në pritje të një tjetër vendimi rreth kësaj çështje”, shkruan “La Gazzetta Dello Sport” pas seancës së sotme duke bërë të qartë se pret që nesër, Juventusi të ketë 15 pikë më shumë në renditje.
Një vendim që trondit renditjen e Serisë A sa i përket luftës për Ligën e Kampioneve, pasi nxjerr jashtë katërshes së parë si Milanin, ashtu edhe Interin, duke i rrezikuar seriozisht. Juventusi do të ngjitej menjëherë në vendin e tretë në renditje, me 59 pikë, vetëm 2 më pak se Lacio e vendit të dytë dhe 3 më shumë se Roma e vendit të katërt.
Milani do të zbriste në vendin e pestë me 53 pikë, i ndjekur nga Interi me 51 pikë e më pas nga Atalanta me 49. Një situatë që do të bënte shumë më të tensionuar për milanezët 8 javët e mbetura në Serinë A.
Kuqezinjtë luajnë kundër Romës dhe Juventusit në transfertë në këto javë ndërsa presin edhe Lacion në fushën e tyre. Nga ana tjetër, Interi në këto javë pret Lacion dhe Atalantën, ndërsa luan në transfertë ndaj Romës e Napolit.
RENDITJA E SKUADRAVE TË KREUT NËSE JUVENTUSIT I KTHEHEN PIKËT
Napoli 75 pikë
Lacio 61
Juventus 59
Roma 56
Milan 53
Inter 51
Atalanta 49
