Kryetari i Partisë Demokratike të Kavajës, Hysen Kadiu ka denoncuar injorancën e kryebashkiakut Redian Krali i cili uron besimtarët myslimanë për Kurban Bajramin, ndërkohë që të premten, 21 prill, është dita e Fiter Bajramit, dita ku besimtarët myslimanë dalin të pa agjërueshëm pasi kanë agjëruar gjatë gjithë muajit Ramazan.
“Kandidati për “Myfti” i Kavajës, nuk e di as çfarë Bajrami është.
Të premten e 21 prillit është Dita e Fitër Bajramit dhe jo e Kurban Bajramit !
Kështu është kur nuk mban vendin tënd, por kërkon të bësh politikë me fenë dhe besimin e njerëzve!”- shkruan Kadiu në Facebook.
Fitër Bajrami është festa e cila bëhet pas mbarimit të muajit të Ramazanit. Emri Fitër Bajram vjen nga ajo se myslimanët para ditës së bajramit shpërndajnë lëmoshë, solidarizohen me të varfrit, kështu për ta festuar së bashku këtë festë. Ndërsa Kurban Bajrami ka të bëjë me sakrificën që bëhet në emër të profetit Ibrahim. Kjo sakrificë është prerje e një kafshe (dele, qengj ose cjap) si kurban. Sipas rregullave kjo kafshë duhet të jetë së paku një vit i vjetër. Kurban Bajrami bie në ditën e 10-të të muajit Dhulhixhxhe, muaji i dymbëdhjetë i kalendarit Islam.
