Bllokimi i konstituimit të Këshillit të Lartë të Prokurorisë, për shkak të mungesës së kandidaturave nga shoqëria civile, duket se vjen edhe si pasojë e kritereve të forta të vendosura.
Në një prononcim për TemA TV, drejtuesja ekzekutive e Komitetit të Helsinkit, Erida Skënderaj, është shprehur se kërkesat e vendosura për jurist në KLP janë të vështira për t’u arritur nga kandidatët.
Sipas saj mundësi e mirë do të ishte që kur këto kritere, u vendosën në ligj, paraprakisht duhet të bëhej një studim dhe të shikohej nëse kishte kontingjent të mjaftueshëm në shoqërinë civile që të plotësonin në mënyrë kumulative kriteret bazike.
“Janë bërë sesione të shumta informimi…Më e mira do të ishte që kur këto kritere u vendosën në ligj të bëhej një studim dhe të shikohej nëse kishte realisht kontigjent të mjaftueshëm në shoqërinë civile që plotësonin në mënyrë kumulative ato kritere që diskutoheshin gjatë procesit draftues”,- është shprehur Skënderaj.
