Një ngjarje në kufijtë e të pabesueshmes është regjistruar në Agjios Panteleimonas të Greqisë gjatë natës së të Enjtes së Madhe.
Mediat vendase raportojnë se një grua 52-vjeçare nga Shqipëria ka lyer me benzinë bashkëshortin e saj 57-vjeçar dhe i ka vënë zjarrin duke pasur për qëllim t’a djegë të gjallë.
Skena e tmerrshme ka ndodhur në orën 21:30 të mbrëmjes. Sipas policisë, pas një sherri të ashpër me bashkëshortin e saj, gruaja e ka sulmuar me lëngun e djegshëm dhe i ka vënë flakën.
Burri në gjendje të mjerueshme dha alarmin, ndërsa fqinjët njoftuan policinë dhe 52-vjeçarja u arrestua.
Ndërkohë, gruaja ka mohuar ngjarjen, duke u justifikuar se i shoqi kishte tentuar që t’i vinte flakën vetes. Ky arsyetim nuk u besua nga policia dhe e akuzuara është arrestuar dhe dërguar në Zyrën kundër Dhunës në Familje në Omonia.
Ndërkohë, viktima po trajtohet për djegie në spitalin “Georgios Gennimatas”.
