Vendimi i Benet Becit për të hyrë në garën e 14 Majit duke kandiduar për PS në bashkinë e Shkodrës, i ka hapur vendin ish-ministrit të Shëndetësisë, Ilir Beqja për t’u rikthyer në Parlament.
Por, sipas rendit të ditës së Komisionit Qendror të Zgjedhjeve, rezulton se Beqja ka refuzuar të kthehet si ligjvënës, në një kohë kur ka disa çështje të hapura në SPAK që lidhen me koncesionet e dhëna si ministër.
Në renditjen e KQZ-së, pas Beqjes është Frrok Gjini, i cili pritet të marrë mandatin e deputetit për Partinë Socialiste.
Ndërkohë, në mbledhjen e sotme ku do të miratohet plotësimi i vendeve të mbetura bosh në Parlament si pasojë e kandidimit për kryetarë bashkie në zgjedhjet lokale të 14 majit, pritet edhe zëvendësimi i Zef Hilës.
Hila dorëzoi mandatin si deputet i PD në Shkodër, pasi do të kandidojë për kryetar bashkie në Vaun e Dejës.
Pas largimit të tij, në radhë vinte Bardh Spahia, por edhe ai ka refuzuar rikthimin në Parlament pasi pas fitores në zgjedhjet e 6 Marsit, po kandidon sërish nën siglën e koalicionit opozitar “Bashkë Fitojmë” për Bashkinë e Shkodrës.
Pas refuzimit të mandatit nga ana e Spahisë, vendin në Parlament pritet ta marrë Lodovik Hasani, i cili ka qenë kandidati i dytë më i votuar pas kryebashkiakut aktual të Shkodrës në zgjedhjet parlamentare, me 3451 vota preferenciale.
Rendi i ditës i KQZ
“Për shpalljen e moszgjedhshmërisë së kandidatit të radhës në listën shumemërore të Partisë Socialiste të Shqipërisë, Qarku Shkodër, z. Ilir Hamit Beqaj, për plotësimin e vakancës së njoftuar nga Kuvendi i Shqipërisë.
“Për shpalljen e moszgjedhshmërisë së kandidatit të radhës në listën shumemërore të Koalicionit Partia Demokratike – Aleanca për Ndryshim, Qarku Shkodër, z. Bardh Ali Spahia, për plotësimin e vakancës së njoftuar nga Kuvendi i Shqipërisë.
