Prindërit dhe vëllai i autorit të krimit të dyfishtë ishin të parët që u morën në pyetje nga policia.
Erjon Sinani sapo ka mësuar vrasjen makabre të së shoqes nga i vëllai, ka rrëfyer se marëdhëniet mes tyre nuk kanë qenë të mira.
Fakti që jetonin nën një çati ka ndikuar në rritjen e dozës së debateve. Shkak kanë qenë sjelljet e autorit dhe fakti që për një periudhë të gjatë ai nuk ka qenë i punësuar. Erioni ka dëshmuar se edhe janë kërcënuar me jetë nga Roland Sinani, por bashkë me Migenën, nuk i kanë dhënë shumë rëndësi.
Më pas e ëma e tyre në një gjendje të rënduar psikologjike ka dëshmuar në polici një detaj të rëndësishëm. Ajo ka treguar për hetuesit se e ka parë të birin me pistoletë në dorë pak përpara orës 4. I ka kërkuar t’ia japë asaj armën e të shkojë të flerë. Por i biri ka refuzuar. Minuta më pas janë dëgjuar krisma.
Tri krisma që kanë zgjuar nga gjumi edhe fqinjët. Ata tregojnë se pjesëtarët e familjes Sinani ishin njerëz të qetë e pak të distancuar nga të tjerët. Por thonë edhe se Roland Sinani njihej në lagje si një djalë që kurohej me ilaçe për depresion.
Problemet e shëndetit mendor për të kishin nisur kohë më parë kur ai frekuentonte një repart të ushtrisë. Më tej, për një periudhë të gjatë ai kishte qenë i papunë. Së fundmi kishte nisur të punonte në një gomisteri.
Kur dita zbardhi dhe lajmi u përhap, mbërritën edhe familjarët e Migena Sinanit. Nëna e dy fëmijëve, viktimë e ngjarjes, kishte punuar për një kohë të gjatë në një market.
Më pas ishte shkëputur për t’iu përkushtuar të miturve të saj. Por njëkohësisht edhe kunatit beqar e të papunë.
Vjehrri dhe vjehrra të moshuar e me probleme të mëdha shëndetësore, ishin një tjetër barrë për 37-vjeçaren.
Pas një dite të lodhshme, ajo ishte duke fjetur me vajzën 2 vjeçe në të njëjtin shtrat kur u qëllua nga i kunati.
/TV Klan/
