Një person, i punësuar si kamarier në një lokal që ndodhet pranë banesës së familjes Sinani, është dëshmitari i vetëm që e ka parë 43-vjeçarin Roland Sinani para se t’i jepte të jetës, ndërsa më parë kishte vrarë kunatën e tij Migena Sinani, në dhomën e gjumit.
Kamarieri ka rrëfyer për News24 se e ka parë 43-vjeçarin në oborr me armë në dorë.
“Në një moment më drejtoi mua armën dhe u ndjeva i frikësuar”, është shprehur ai.
Ndërkohë, policia ka shoqëruar pas krimit prindërit e autorit të dyshuar, të cilët kanë dhënë dëshminë e tyre duke u shprehur se nuk e kanë parë skenën e krimit pasi kanë qenë në gjumë.
Vjehrra e viktimës (nëna e Rolandit), e cila është me probleme të shumta shëndetësore dhe hekura në të dyja këmbët ka treguar se me vështirësi ka shkuar deri në dhomën e 37-vjeçares së ndjerë pas ngjarjes, ku e ka parë nusen e shtëpisë të pajetë.
Ndërkohë bashkëshorti i 37-vjeçares punonte si taksist gjatë natës dhe nuk ishte në shtëpi kur ndodhi krimi. Ai kishte qenë për shumë kohë i papunë dhe së fundmi kishte nisur të punonte.
