Detaje të reja kanë dalë në dritë nga dosja e Prokurorisë së Lezhës mbi vrasjen e biznesmenit Ardian Nikulaj, më 19 prill në Shëngjin.
Aty nënvizohet se gjatë këqyrjes së vendit brenda lokalit të tij ku 51-vjeçari u gjet i vdekur, u gjetën 6 gëzhoja arme zjarri, 5 prej të cilave me markonim 11-56 dhe njëra me markonim 11-64.
Po ashtu një predhë si ato model 54 e cila u gjet në karrigen ku ndodhej i pajetë Nikulaj.
Në tavolinën ku ishte ulur biznesmeni lezhjan kur u qëllua për vdekje nga Ruben Saraiva, u gjet një celular i markës ‘Iphone’, i dëmtuar për shkak të predhave të armës si dhe një kartë SIM.
Ndërkohë, është konstatuar se viktima kishte dy plagë në kokë, dy plagë në trup dhe dy plagë në secilin prej krahëve të tij.
Në dosjen hetimore gjithashtu bëhet me dije se organizatori i atentatit, Edmond Haxhia përdori të fejuarën e tij për të blerë motorin që u përdor nga “killeri” portugez në ditën e ngjarjes.
Personi i cili i ka shitur motorin tregon se është marrë në telefon nga një person i cili nuk i ishte prezantuar, por vetëm e kishte pyetur nëse ende e kishte motorin për ta shitur.
Pasi ranë dakord, ata janë takuar në zonën e njohur si “kryqëzimi i 21 Dhjetorit”, ku Edmond Haxhia dhe e fejuara e tij e prisnin pronarin e motorit brenda një automjeti tip “Mercedez Benz”.
Më pas kanë shkuar të shtëpinë e tij për të parë motorin, të cilin Edmond Haxhia e ka pëlqyer dhe ka vendosur ta blejë, duke e pyetur sërish për çmimin por pa bërë ‘pazar’ për ulje.
Pasi kanë rënë dakord, është nënshkruar kontrata e shitblerjes tek një notere pranë Zogut të Zi, ku Edmond Haxhia ka kërkuar që motori të vihet në emër të vajzës që e shoqëronte duke thënë se ishte nusja e tij.
Më tej në dosjen e prokurorisë zbulohet se Edmond Haxhia ka bërë pagesën prej 1 mijë eurosh ndaj personit që i bleu motorin dhe i ka kërkuar ta priste që të kthente lekët në euro që të mos kishin probleme me kursin e këmbimit. Më pas ka shkuar në një pikë “Exchange” që ndodhej pranë zonës, ka kthyer lekët në euro dhe më pas ka bërë pjesën e mbetur të pagesës.
