Një sulm me armë ndaj zyrës së partisë së saj nacionaliste të opozitës “Partia e Mirë (İYİ) më 31 mars, vetëm pak orë pas kërcënimeve të Presidentit Rexhep Tajip Erdogan, kanë bërë që liderja Meral Aksener të kundërpërgjigjet ashpër në Kuvend.
Duke mos toleruar aspak zbrazjen e armës ndaj zyrave të IYI në Zegitburnu të Stambollit, Aksener u ngjit në podium duke shigjetuar indirekt kundërshtarin e saj politik, Erdogan.
“Plumbat nuk do të na ndalojnë”, – deklaroi ajo teksa mbante në dorë fishekë të vërtetë pistolete.
Më pas Aksener pyeti anëtarët e partisë së saj: “Kemi pasur sukses dhe kemi kapërcyer kaq shumë pengesa. A do të na ndalojë ky plumb? Kjo shkëndijë do të bëhet zjarr. A më premtoni? Do t’i rezistoni të gjitha kërcënimeve dhe shpifjeve. Më premtoni?”.
Dhe kolegët iu përgjigjën njëzëri: “Po, premtojmë!”.
Shfaqja e asaj që njihet si “Zonja e Hekurt” e Turqisë arriti kulmin kur Aksener mori plumbat në duar dhe filloi t’i hedhë sa majtas e sa djathtas.
Sa i përket sulmit me armë ndaj “Partisë së Mirë” në Stamboll, zyra u vu në shënjestër nga një agresor i paidentifikuar i cili qëlloi mbi to disa ditë pasi presidenti Recep Tayyip Erdogan kërcënoi Meral Akşener.
Sipas raportimeve të mediave turke, dy plumba goditën ndërtesën në Zeytinburnu rreth orës 10:30 të mëngjesit të së premtes, me një prej tyre që përshkoi tej për tej dritaren dhe përfundoi në një kolltuk brenda zyrës.
Buğra Kavuncu, një këshilltare kryesore e Akşenerit dhe ish-kryetarit të provincës së Stambollit të Partisë İYİ, shkroi në Twitter se incidenti ishte rezultat i gjuhës së urrejtjes, fyerjeve dhe kërcënimeve që synonin Akşenerin dhe partinë e saj.
“Kujdes nga ne. Emri im është Tajip, mbiemri im është Erdogan. … Do të më drejtoheni në përputhje me rrethanat kur të flisni dhe mos më bëni të merrem me ju”, tha Erdogan në një intervistë televizive më 29 mars.
Kërcënimi i tij erdhi pasi Akşener e kritikoi atë gjatë një takimi partie, duke thënë: “Vetëm shko dhe shife veten në një pasqyrë, zoti Rexhep. A mendon se kjo që po bën është të sundosh këtë vend?”.
Pas kërcënimit të presidentit, Akşener i tha atij të pinte “çaj kamomili” në mbrëmje për t’u çlodhur pasi ai duket shumë nervoz në ditët e tij të fundit si president.
Akşener mbërriti në ndërtesën e partisë në Stamboll menjëherë pas sulmit dhe foli për shtypin, duke thënë se ajo ishte kërcënuar dhe partia e saj u sulmua për shkak të gjinisë së saj.
“Të gjitha llojet e fyerjeve dhe pisllëqeve që nuk do të drejtoheshin kurrë ndaj një politikani mashkull, më drejtoheshin mua. Kjo ndodhi sepse unë jam një grua. Nëse kjo më ndodh mua – një politikane femër, çfarë mund të ndodhë me gratë dhe vajzat e tjera?”, tha Akşener, duke u kërkuar grave në Turqi të votojnë për partinë e saj dhe Kemal Kılıçdaroğlu, kandidatin e përbashkët presidencial të opozitës, për t’i dhënë fund dhunës që synon gratë.
“Nuk vepron kështu një president. Partia jonë u sulmua për shkak të kërcënimit të zotit Rexhep”, shtoi ajo.
