Një shpërthim me eksploziv ndodhi këtë të Hënë në Shkozet të Durrësit.
Kështu nisi java – me një tjetër atentat mafioz, ashtu si edhe ajo e kaluara – kur mbi godinën e “Top Channel” u lëshua breshëri plumbash, duke lënë të vrarë rojën e televizionit, babai i tre fëmijëve. Autorët e të dyja ngjarjeve janë të lirë. Të lirë janë dhe ata të atentatit tjetër brutal të ndodhur në lokalin në zonën e “Don Boskos” në Tiranë, ku plumbat i morën jetën banakieres Mimoza Paja në prani të mbesës së mitur, ndërsa plagosën gjashtë të tjerë.
Lista e ngjarjeve të rënda kriminale shtohet, vrasje, atentate, plagosje. Jetë njerëzish që merren sikur jeta të vlejë shumë pak… Vetëm muajin e kaluar u vranë 8 persona në ngjarje tronditëse, nga masakra e kryer nga Dan Hutra te ajo e Kavajës, ku dy persona qëlluan për vdekje njeri-tjetrin me thikë dhe armë zjarri. Shumë të tjerë mbetën të plagosur.
“Ndihem 800% i pasigurt”, tha një qytetar për mediat një ditë pas krimit në Kavajë.
Pavarësisht fakteve dhe perceptimit të qytetarëve, për kryeministrin Edi Rama situata e rendit “s’ka qenë kurrë më mirë”. Kështu do të shprehej kreu i qeverisë pas sulmit ndaj Top Channel. Ndërsa kryetari parlamentar socialist Taulant Balla, tha se ministri i Brendshëm Bledi Çuçi “bën një punë të mirë”.
Qëndrimi u përsërit sërish sot nga kryeministri Rama. Foli pikërisht pas një tjetër atentati, atij në Shkozet. Shqipëria nuk është vend i krimit, u shpreh.
“Vendi i krimit, i mafias, i drogës, i prostitutave, i plehrave, i varfërisë ekstreme, hajdutëve dhe lypsave në çdo rrugë apo të pastrehëve që flenë rrugëve, është pjesërisht një vend, të cilin ne e kemi lënë pas në të shkuarën dhe pjesërisht një vend që e mbajnë gjallë në retorikën e tyre, dashakeqe dhe spekulante, vendas dhe të huaj, me gojën e tyre apo me penën e tyre”, tha ai gjatë një aktiviteti.
A jemi vend i plehrave, apo na i kanë pastruar inceneratorët?
Vala masive e emigracionit, siç ridokumentohet në raporte të njëpasnjëshme a nuk ndodhin për shkak të varfërisë, bindjes se qeverisemi nga një oborr hajdutësh?
A e kanë sigurinë në dorë bandat e drogës, të krimit?
A ka të drejtë qytetari në Kavajë apo kryeministri Edi Rama?
