Policia e Durrësit ka reaguar në lidhje me aksidentin që ndodhi mbrëmjen e djeshme në aksin Sukth – Manzë, ku për pasojë mbeti i vrarë shtetasi me iniciale M.N.
Viktima ishte pasagjer në motomjetin pa targa që drejtohej nga shtetasi, Gj.R. Ai është përplasur fillimisht nga shtetasi A.H, 24 vjeç dhe ka rënë në tokë, ndërsa i riu është larguar nga vendi i ngjarjes. Më pas viktima është goditur edhe nga automjeti me drejtues shtetasin H.H. i cili po ashtu është larguar nga vendi i ngjarjes.
Policia bën me dije se ka arrestuar dy drejtuesit e automjeteve dhe po ashtu edhe drejtuesin e motomjetit.
“Specialistët e Qarkullimit Rrugor të DVP Durrës kapën dhe arrestuan shtetasit A. H., 24 vjeç, banues në Sukth, H. H., 66 vjeç, banues në Sukth i Ri dhe Gj. R., 43 vjeç, banues në Kullë, Durrës. Rreth orës 20:45, në aksin rugor “Sukth – Manëz”, automjeti me drejtues shtetasin A. H., është përplasur me motomjetin pa targa, me drejtues shtetasin Gj. R. dhe me pasagjer shtetasin M. N. Nga kjo përplasje, ka rënë nga motomjeti, në rrugë, shtetasi M. N., ndërsa 24-vjeçari është larguar nga vendi i aksidentit. Shtetasi M. N., është goditur edhe nga automjeti me drejtues shtetasin H. H., i cili gjithashtu është larguar nga vendi i aksidentit. Si pasojë, shtetasi M. N. ka humbur jetën.”-njofton policia.
Materialet procedurale i kaluan Prokurorisë pranë Gjykatës së Rrethit Gjyqësor Durrës, për veprime të mëtejshme, për veprat penale “Shkelja e rregullave të qarkullimit rrugor”, me pasojë vdekjen e një shtetasi, dhe “Largimi nga vendi i aksidentit”.
