Radhët e gjatë për abone në disa pika të shpërndarjes që Bashkia Tiranë ka autorizuar, janë denoncuar sot nga rivali opozitar i Veliajt më 14 Maj, Belind Këlliçi por edhe nga Sekretari i Përgjithshëm i Partisë së Lirisë, Tedi Blushi.
Me anë të një videoje të publikuar në rrjetin e tij social Facebook, Blushi ka denoncuar kaosin që është krijuar në pikat e blerjes së aboneve dhe vuajtjet që duhet të kalojnë banorët kryeqytetas, përveç sakrifikimit të kohës për të pritur në radhë.
Duke iu referuar planit të Këlliçit për transport publik falas, Blushi nënvizon se kjo do t’u japë fund radhëve të kaosit, teksa kujtoi se më 14 maj kjo situatë e mundimshme dhe me kosto për qytetarët, merr fund.
“Vetëm Plani i shkëlqyer i Belind Këlliçit për një transport publik falas dhe modern 🚎 u jep fund radhëve të kaosit, për orë të tëra, në pritje për të blerë abonenë e urbanit. Kjo situatë skandaloze, me shumë mundime dhe kosto për qytetarët, merr fund më 14 Maj!”, shprehet ai.
