Kandidati i opozitës për Bashkinë Tirfanë, Belind Këlliçi, zhvilloi një bashkëbisedim me gazetarin Blendi Fevziu. Ndryshe nga Erjon Veliaj që zgjodhi ta bëjë të njëtën gjë në qendër të Tiranës, duke u mburrur për kullat e larta dhe justifikuar për trafikun që ka mbytur kryeqytetin, Këlliçi zbriti në rrugë, duke sjellë realitetin e prekshëm. Ngushtimi i hapësirave publike është një nga problematikat që Belind Këlliçi, kandidat i koalicionit “Bashkë Fitojmë” për zgjedhjet e 14 Majit, shikon në qytetin e Tiranës. Në një intervistë për emisionin “Opinion” në Tv Klan, Këlliçi mori si shembull korsinë e biçikletave në rrugën “Myslym Shyri”.
“Ka një problematikë shumë të madhe. Ka një problematikë sa i përket ngushtimit të hapësirave publike që i janë bërë lagjeve të Tiranës dhe rrugëve emblematike. Do të të marr një shembull konkret. Jemi këtu dhe ju shihni korsinë e biçikletave. Ju e shihni që frekuenca e atyre që pedalojnë në këtë rrugë me biçikletë apo monopat është shumë e ulët. Ju ftoj që nëse doni, të pyesim bizneset në këtë rrugë emblematike a janë dakord me këtë që ka ndodhur sepse kanë falimentuar pothuajse të gjitha bizneset në këtë rrugë për shkak të vendosjes gabim të korsisë së biçikletave”, tha Këlliçi.
