Fushata elektorale për bashkinë e Tiranës është nxehur dhe 50 ditë para zgjedhjeve peshat e rënda të koalicionit “Bashkë Fitojmë” janë përqëndruar në kryeqytet për të treguar ndryshimin midis kryebashkiakut Erion Veliaj dhe kandidatit opozitar Belind Këlliçi.
Në vijim të turit të takimeve me qytetarët, kreu i Partisë së Lirisë Ilir Meta u ndal në zonën e Saukut, ku u shpjegoi qytetarëve se zgjidhja e problematikave vjen me kthimin e Bashkisë në shërbim të tyre.
Kreu i Partisë së Lirisë u shpreh se plani i kandidatit të opozitës Belind Këlliçi është një nga arsyet pse ai duhet votuar, pasi jep zgjidhje për një sërë problemesh që ka kryeqyteti sot.
Teksa krahasoi listën e Këshillit Bashkiak të propozuar nga koalicioni ‘Bashkë Fitojmë’, ai tha se ajo është si nata me ditën me atë të palës tjetër që është e mbushur me drejtorë, të cilët duhet të përballen me drejtësinë dhe SPAK.
Kreu i Partisë së Lirisë garantoi banorët e Saukut se këshilltarët e Partisë së Lirisë dhe opozitës do të jenë zëri tyre në parlamentin e qytetit për ta sjellë Bashkinë e Tiranës më afër qytetarëve.
