Një 64-vjeçar është arrestuar nga policia e Kakavijës pasi në automjetin me të cilën lëvizte është gjetur kokainë.
Në pranga u vu Vasil Simaku, 64 vjeç, banues në Fier.
“Në Pikën e Kalimit Kufitar Kakavije, në dalje të RSH-së, shërbimet e Policisë Kufitare, në bazë të informacioneve të siguruara në rrugë policore, kanë ushtruar kontroll në automjetin tip ‘Benz’, që drejtohej nga shtetasi V.S. Gjatë kontrollit, shërbimet e Policisë kanë konstatuar një vend të përshtatur në të cilin ishte fshehur një pako me lëndë të dyshuar narkotike kokainë, me peshë totale 346 gramë”, njoftoi policia.
“Në cilësinë e provës materiale u sekuestruan lënda e dyshuar narkotike, një shumë parash, 2 aparate celulare dhe automjeti”, ndërsa “materialet i kaluan Prokurorisë pranë Gjykatës së Rrethit Gjyqësor Gjirokastër, për veprime të mëtejshme procedurale”, shtuan të njëjtat burime.
