Personi në foton e mëposhtme është 60-vjeçari Pal Kola, i cili humbi jetën gjatë sulmit me armë zjarri në ambjentet e Top Channel.
Kola, një qytetar i thjeshtë me të ardhura mesatare kishte 6 muaj që kishte filluar punë si roje në Top Channel, ndërsa mësohet se në momentin e sulmit ishte duke u ngrohur në kabinën e tij, dhe pasi ka dëgjuar të shtënat ka dalë jashtë ku dhe është qëlluar për vdekje.
Kola ishte baba i tre fëmijëve.
Si ndodhi ngjarja?
Ngjarja ndodhi rreth orës 01:00, ku persona ende të paidentifikuar, u afruan me një automjet tip ‘Range Rover’ ma targa të vjedhura dhe hapën zjarr në drejtim të Top Channel. Në vendin e ngjarjes janë sekuestruar të paktën 25 gëzhoja kallashnikovi, ndërsa një nga plumbat ka përfunduar në trupin e punonjësit, duke i marrë jetën.
Pas ngjarjes, autorët janë larguar, ndërsa në aksin Tiranë-Durrës është gjetur automjeti që kanë përdorur në krim bashkë me dy armë tip kallashnikovi.
Nuk dihen ende shkaqet e ngjarjes së rëndë, ndërsa rasti po hetohet nga policia.
