Sulmi me armë zjarri ndaj godinës së Top Channel, gjatë mesnatës vijon të jetë në sitën e hetimeve ndërsa detaje të reja dalin në dritë.
Sipas burimeve për mediat, dy kamera sigurie kanë filmuar qartësisht të gjithë momentin e atentatit.
Bëhet fjalë për një kamera të subjektit Top Channel dhe një kamera tjetër vetëm pak metra metra më tej.
Nga pamjet e siguruara dallohen autorët e sulmit me armë zjarri të cilët përdorën një automjet tip ‘Range Rover’ të vjedhur që u dogj menjëherë pas ngjarjes.
Po të njëjtat burime sqarojnë se një roje në zonën ku është djegur automjeti, ka parë 4 persona që largoheshin vetë 23 sekonda pas vënies së zjarrit makinës dhe dyshohet të jenë larguar me dy makina të ndryshme, përkatësisht një BMW e zezë dhe një Audi gri.
Breshëria e plumbave la të vdekur rojën e sigurisë, 60-vjeçarin Pal Kola, i cili banonte në zonën e Sharrës dhe kishte 6 muaj që kishte filluar punë në Top Channel, ndërsa me origjinë ishte nga Puka.
Si ndodhi ngjarja?
Ngjarja ndodhi rreth orës 01:00, ku persona ende të paidentifikuar, u afruan me një automjet tip ‘Range Rover’ ma targa të vjedhura dhe hapën zjarr në drejtim të Top Channel. Në vendin e ngjarjes janë sekuestruar të paktën 25 gëzhoja kallashnikovi, ndërsa një nga plumbat ka përfunduar në trupin e punonjësit, duke i marrë jetën.
Pas ngjarjes, autorët janë larguar, ndërsa në aksin Tiranë-Durrës është gjetur automjeti që kanë përdorur në krim bashkë me dy armë tip kallashnikovi.
Nuk dihen ende shkaqet e ngjarjes së rëndë, ndërsa rasti po hetohet nga policia.
