Rritja e frikshme me 14.3% e numrit të aksidenteve, 88 në muajin shkurt të këtij viti në krahasim me 77 që kanë ndodhur në të njëjtin muaj në 2022, por edhe numri i lartë i viktimave në rrugët e vendit gjatë 10 ditëve të fundit, duket se nuk ka ndikuar aspak në ndërgjegjësimin e drejtuesve të mjeteve.
Edhe pse Policia Rrugore ka nisur një monitorim të imtësishëm në rrjetet sociale “Instagram” e “Tik Tok”, për të gjobitur dhe ndëshkuar të rinjtë që reklamojnë qarkullimin me shpejtësi në rrugët e vendit, një tjetër rast i shpejtësisë skëterrë është regjistruar në rrugën e Kombit.
Një 27-vjeçar nga Kosova është gjobitur me 55.000 lekë të rinj nga policia, pasi patrulla me radar ka konstatuar se ai drejtonte mjetin me 197km/orë dhe për më tepër nuk kishte vendosur rripin e sigurimit.
Gjithashtu në kuadër të masave të marra për parandalimin e aksidenteve rrugore, 57 drejtues të tjerë mjetesh janë ndëshkuar me gjobë për qarkullim me shpejtësi mbi normën e lejuar në autostradcën Milot-Morinë.
NJOFTIMI:
Qarkullonte në Rrugën e Kombit, në drejtim të Kosovës, me shpejtësi 197 km/orë dhe pa vënë rripin e sigurimit, ndëshkohet me masë administrative 55 000 lekë, drejtuesi i automjetit tip “Audi A7”, shtetas nga Kosova.
Si rezultat i monitorimit intensiv nga punonjësit e Policisë Rrugore, duke përdorur pajisjet e logjistikës bashkëkohore, që ka tashmë në dispozicion Policia Rrugore, në aksin rrugor “Tuneli i Kalimashit-Morinë”, u konstatua mjeti luksoz tip “Audi A7” që qarkullonte me shpejtësi tej normave të lejuara.
Pas verifikimeve, rezultoi se 27-vjeçari nga Kosova e drejtonte mjetin, me shpejtësi 197 km/orë dhe pa vënë rripin e sigurimit. Për te dyja këto shkelje, konform Kodit Rrugor, ky shtetas u ndëshkua me masë administrative 55 000 lekë të rinj.
Gjithashtu, për shkak të rritjes së fluksit të lëvizjes, gjatë fundjavës që lamë pas, shërbimet e Njësisë për Sigurinë e Autostradës “Milot-Morinë”, kanë intensifikuar kontrollet, duke përdorur mjetet inteligjente, me qëllimin e vetëm, parandalimin e aksidenteve rrugore. Gjatë kësaj fundjave, janë evidentuar dhe ndëshkuar me masat administrative përkatese:
357 drejtues mjetesh, për qarkullim me shpejtësi mbi normën e lejuar. Për 41 prej tyre, është caktuar edhe sanksioni plotësues, pezullim i lejes së drejtimit;
70 drejtues mjetesh, për parakalime të gabuara;
3 drejtues mjetesh, për drejtim të mjetit, nën efektin e alkoolit.
Në të gjithë gjatësinë e autostradës “Milot-Morinë”, vijojnë kontrollet me makina inteligjente, radarë automatikë, dronë, kamera dhe alkool-testues, me qëllim parandalimin e aksidenteve rrugore.
