Kreu i KQZ-së, Ilirjan Celibashi regjistroi për zgjedhjet e 14 Majit koalicionin opozitar “Bashkë Fitojmë”, por pa PD-në e drejtuar nga Sali Berisha. Po ashtu, ai regjistroi “grupin Aibeaj” si Partia Demokratike, duke “noterizuar” vendimin e mëparshëm të Komisionit të Sanksioneve dhe Ankesave.
Në KQZ u shqyrtua këtë të Shtunë kërkesa e Koalicionit “Bashkë Fitojmë”, për regjistrimin si subjekt zgjedhor në zgjedhjet lokale të 14 maj 2023” Kjo ishte pika e dytë e mbledhjes së sotme të KQZ, që më herët miratoi regjistrimin e koalicionit “Aleanca Liberale e Djathtë” në lokalet e ardhshme.
Gjatë seancës së sotme, Indrit Sefa si përfaqësues i “grupit Alibeaj” kërkoi rrëzimin e kërkesës së koalicionit të PD-së së drejtuar nga Berisha me PL-në e Metës, PDK-në dhe PPBDNJ-në. “PD s’ka bërë asnjë koalicion. Marrëveshja e depozituar në KQZ është në mashtrim të ligjit dhe në mashtrim të zgjedhjeve. Kërkesa duhet rrëzuar për sa kohë marrëveshja që është një dokument i domosdoshëm për paraqitjen në KQZ, s’është e ligjshme. Në të është shprehur vullneti për PD nga persona të paautorizuar. PD s’ka bërë asnjë koalicion aq më pak me PL me PDK dhe PBDNJ”, tha Sefa.
Nga ana tjetër, dy përfaqësuesit ligjorë të koalicionit opozitar argumentuan se vendimi i KAS që i hapi rrugë grupit Alibeaj të regjistrohet si PD në zgjedhje’ s’është i formës së prerë. “Vendimi i KAS i pazbatueshëm pasi ligji lejon ankim pas pesë ditësh dhe komisioneri s’është shprehur akoma. Sefës i mungon legjitimiteti, pasi KQZ s’është regjistruar si përfaqësues ligjor”, u shpreh Altin Kaziaj.
Sefa u kundërpërgjigj duke thënë se vendimi i KAS “hyn në fuqi menjëherë”.
Pasi dëgjoi palët, kreu i KQZ-së Ilirjan Celibashi vendosi regjistrimin e koalicionit “Bashkë Fitojmë”, por pa PD-në e drejtuar nga Berisha. Celibashi tha i qëndron argumentit të bërë më herët kur rrëzoi kërkesën e PD-së së Berishës për tu regjistruar në zgjedhje (kryetar i kësaj partie sipas vërtetimit nga Gjykata e Tiranës rezulton Lulzim Basha).
Kryekomisioneri tha se koalicioni do të regjistrohet me partitë PL, PDK dhe PBDNJ. Më herët, kryetari i Partisë Demokratike Sali Berisha ka bërë të ditur se nën logon e këtij koalicioni do të garojnë kandidatët e dalë nga “primaret”.
Grupi Alibeaj regjistrohet si PD
Pika e tretë në rendin e ditës së mbledhjes së sotme ishte ajo për “zbatimin e vendimit nr. 27, datë 16.3.2023, të Komisionit të Ankimimeve dhe Sanksioneve”. Bëhet fjalë për vendimin që regjistroi “grupin Alibeaj” si PD në zgjedhjet e 14 Majit.
Si përfaqësues i grupit Alibeaj, ashtu dhe ai i PD-së së drejtuar Berisha, paraqiten argumentet pro dhe kundër vendimit të KAS.
Në fund, Celibashi tha se ligji e detyron të zbatojë vendimin e KAS, duke i dhënë grupit Alibeaj përdorimin e vulës dhe logos së PD-së për zgjedhjet e 14 Majit.
“Vendim i KAS ngelet teknikisht për tu zbatuar nga Komisioneri Shtetëror pasi është akti për tu respektuar nga Kodi zgjedhor. Ngelet vetëm aplikimi dhe zbatimi i këtij vendimi”, tha Celibashi.
