Do të varroset në vendlindje, Denis Gjura, atleti shqiptar i cili humbi jetën në aksidentin tragjik të ndodhur ditën e enjte në Patra të Greqisë.
Automjeti me të cilin lëvizte 25-vjeçari doli nga rruga në kthesë dhe u përplas me trafikndarëset, duke rezultuar fatale për të riun.
Departamentit Hetimor i Qarkullimit në Patras po vijon punën për zbardhjen e saktë të shkaqeve dhe rrethanave të aksidentit, ku nga të dhënat paraprake informohet se 25-vjeçari ka qenë duke udhëtuar me rrip sigurimi. Gjithashtu gomat e automjetit janë konstatuar në gjendje mjaft të mirë.
Hetuesit besojnë se plaga vdekjeprurëse në qafën e 25-vjeçarit mund të mos jetë për shkak të goditjes, por nga hapja e airbag-ut të shoferit.
Ndarja nga jeta e 25-vjeçarit ka shkaktuar trishtim në botën e sportit në Patra, për shkak të miqësive që i riu shqiptar kishte krijuar.
“Ai ishte i mrekullueshëm, ai punonte në mëngjes për të ndihmuar familjen e tij, ashtu si vëllai i tij Aurel, dhe pastaj së bashku vinin në stërvitje,” tha trajneri i tij.
