Policia ka arrestuar pasditen e djeshme shefin e Stërvitjes pranë Repartit Special RENEA, pasi në automjetin me të cilin lëvizte u gjet një shumë e konsiderueshme parash të padeklaruara.
Altin Morina u arrestua nga kolegët e tij në zonën e Kodrës së Diellit, me një makinë tip Audi SQ8, vlera e të cilës i tejkalon pagën e tij vjetore te RENEA.
Gjatë kontrollit rezultoi se në serdiljen e pasagjerit, në vendin e parë të automjetit, ndodhej një qese plasmasi brenda të cilës kishte lekë, euro dhe paund.
Nga numërimi rezultoi se në qesen e plasmasit kishte rreth 113 mijë euro, rreth 290.00 lekë të rinj dhe 80 paund, të cilat u sekuestruan në cilësinë e provës materiale.
Morina akuzohet për veprat penale “Pastrimi i produkteve të veprës penale ose veprimtarisë kriminale”, “Fshehja e të ardhurave” dhe “Shpërdorimi i detyrës”.
Hetimet vijojnë për të zbuluar origjinën e shumës së madhe të parave që efektivi i policisë kishte me vete. Ka dyshime se përveç lidhjes me eksponentë të caktuar të krimit në Shqipëri, ish-efektivi mund të ketë qenë i përfshirë në dhënien e parave me fajde.
Kush është Altin Morina?
Altin Morina, 39 vjeç, është prej vitesh pjesë e strukturës policore. Karriera e tij ka nisur në strukturën e sotme të AMP, (Agjencia e Mbikqyrjes Policore), ish-SHÇBA e dikurshme. Altin Morina punoi në vitin 2012 në SHÇBA dhe më pas kaloi në radhët e Policisë, ku qëndroi si oficer në Komisariatin nr.3 në Tiranë. Nga atje, karriera e tij njohu vetëm rritje, pasi më pas drjetoi komisariatin e Policisë në Ballsh. Nga Ballshi, Morina kaloi në RENEA ku ishte në detyrë deri në momentin e arrestimit.
Lexo edhe:
113 mijë euro në makinën luksoze, efektivi i RENEA-s: Paratë i kam marrë për hall
