Komisioni i Ankimimeve dhe Sanksioneve rrëzoi kërkesën e partisë “Lëvizja Bashkë“ për regjistrimin në zgjedhjet vendore të 14 majit dhe lënien në fuqi të vendimit të Komisionerit Shtetëror të Zgjedhjeve.
Me vendimin e sotëm drejtuesi i “Lëvizja Bashkë”, Arlind Qorri, nuk do të mund të kandidojë në garën, që pritet të jetë një betejë “kokë më kokë” mes Erion Veliajt dhe Beind Këlliçit.
Gjatë një reagimi zyrtar “Lëvizja Bashkë” bën me dije se vendimi i KAS vjen si një lojë e Ramës dhe Veliajt për të mos lejuar regjistrimin e kësaj partie për zgjedhjet lokale. Në fjalën e tij për mediat pas vendimit, Qorri i cilësoi argumentet e dhëna nga Kryekomisioneri Shtetëror i Zgjedhjeve, Ilirjan Celibashi, të papranueshme dhe skandaloze.
Qorri deklaroi se Veliaj dhe Rama kanë frikë nga kjo parti e re madje ka garantuar se do të mbledhë firmat për të dalë si kandidat i pavarur.
Reagimi i plotë nga “Lëvizja Bashkë”:
“KAS-i VAZHDON LOJËN E EDI RAMËS DHE ERION VELIAJT
Në shtetin e Maliqëve nuk mund të ketë drejtësi. Sot KAS-i përsëriti paligjshmërinë e Gjykatës së Tiranës dhe Komisionerit Shtetëror të Zgjedhjeve duke vendosue me shumicë votash kundër regjistrimit të Lëvizjes BASHKË si subjekt zgjedhor në zgjedhjet e 14 majit.
Nga sa na u komunikua, vendimi i KAS-it është marrë me shumicë votash. Ne dyshojmë fort se ata që kanë votuar kundër nesh kanë qenë tre përfaqësuesit e Partisë Socialiste.
Pse këta përfaqësues të Partisë Socialiste, që nuk janë njerëz të ligjit por të Maliqit, të Maliq Ramës, përsëri si Maliq Celibashi, votojnë kundër regjistrimit të Lëvizjes BASHKË?!
Pse nuk duan t’ia dinë për argumentet?!
Pse nuk duan t’ia dinë për ligjin?!
Pse nuk duan t’ia dinë për Kodin Zgjedhor?!
Pse nuk duan t’ia dinë për Ligjin e Partive Politike?!
Çfarë e frikëson Edi Ramën dhe Erion Veliajn?!
Ata kanë frikë nga një lëvizje politike e vërtetë. Ata kanë frikë nga njerëz të ndershëm, të organizuar, me ideale, me programin e duhur, që nuk kanë frikë të thonë të vërtetën.
Kjo është paligjshmëria e tretë që i bëhet Lëvizjes BASHKË dhe është fund e krye politike. Ata që na mohojnë të drejtën nuk kanë as çerek argumenti, nuk kanë as minimumin e bazës ligjore, thjesht ashtu u intereson. Thjesht ashtu i kanë urdhëruar ata që u japin rrogën, ata që i kanë vënë në këto poste, ata që u premtojnë lloj-lloj privilegjesh.
Ne i kemi kundër institucionet e korruptuara, por kemi pro ligjin dhe popullin e Tiranës dhe Shqipërisë.
Nga sot aksioni ynë politik do të intesifikohet për mbledhjen e 7 mijë nënshkrimeve. Na gjeni në katër pika: Biblioteka Kombëtare, Zogu i Zi, Pedonalja dhe Parku Rinia.
Bashkë do t’ia dalim!”, thuhet në njoftim.
