Përfaqësuesi ligjor i kreut të Partisë Demokratike, Sali Berishës ka folur pas mbledhjes së KQZ-së ku u rrëzua kërkesa e grupit të Alibeajt për t’u regjistruar në zgjedhjet e 14 majit.
Lidhur me vendimmarrjen e fundit, Ledio Nuraj tha se do të ankimohet ky vendim në KAS.
Nuraj: “Duhet të ndërgjegjësohemi se vula nuk ka kaluar ashtu siç është munduar të paraqesë propaganda e qeverisë. Vula, simbolet e PD-së është në dorën e anëtarësisë dhe aty ku është anëtarësia. PD është ajo ku aderon anëtarësia e saj prej 30 vitesh me kryetar Sali Berishën. Ne kemi kërkuar të zbardhet vendimi i sotëm për të cilën do ushtrojmë të drejtën ankimore në KAS“.
Grupi i Alibeajt nuk do të regjistrohet në zgjedhjet lokale të 14 majit. Vendimi është marrë nga Komisioneri Shtetëror për Zgjedhjet, Ilirjan Celibashi, në mbledhjen e sotme të KQZ-së. Sot, sipas KQZ, legjitimitetin për të kërkuar legjitimitetin për regjistrimin e PD në zgjedhje e ka Lulzim Basha, i cili ligjërisht figuron kryetar, edhe pse ka dhënë publikisht dorëheqjen. Por problem është fakti që Basha nuk ka firmosur deklaratën solemne për regjistrimin në zgjedhje.
