Kreu i Partisë Demokratike, Sali Berisha po prezanton sot kandidatin për Bashkinë Pogradec, Zini Tollozhina, të dalë nga procesi për Primaret, për të kandiduar për zgjedhjet e 14 majit.
Që në nisje të fjalës së tij Berisha tha se kandidatët e tij janë ata që do të sjellin lirinë, ndërsa sfidoi Ramën duke pohuar se jo vetëm që do të hyjnë në zgjedhje, por dhe do të fitojnë.
“Jam këtu për të paraqitur para jush një nga demokratët më të devotshëm, një nga bijtë e Pogradecit si kandidat për kryetar Bashkie. Kudo ku shkoj ndjej një këndesi të veçantë se asnjë nga kandidatët që paraqes nuk janë kandidat të kryesisë apo kryetarit, por të votës suaj dhe të lirisë. Sot garojnë kandidatët e lirisë, karshi kandidatët e bodrumeve, shpellave dhe dosjeve të fshehta. Asnjë njeri nuk kam dëgjuar se ça procedure ndjek partia tjetër, e krimministrit, ndjek procedurën e klaneve kriminale dhe valixheve me euro që paraqiten për të garuar. Ne vijmë sot në një moment të paprecedent në 32 vite”, tha Berisha.
Berisha u shpreh se po bëhet përpjekje anti kushtetuese për të përjashtuar forcën kryesore opozitare nga zgjedhje për të konsoliduar monizmin.
Gjithashtu Berisha u shpreh se kandidatët e lirisë, jo vetëm që do të marrin pjesë në zgjedhje por do të shkojnë drejt përmbysjes së monizmit të Edi Ramës.
“Po bëhet një përpjekje anti kushtetuese për të përjashtuar forcën kryesore opozitare nga zgjedhjet. Bëhet përpjekje për të konsoliduar monizmin. Në asnjë vend të botës së lirë, akte të tilla nuk kanë ndodhur. Jo vetëm që do të marrim pjesë në zgjedhje me kandidatët tanë të lirisë por do të shkojmë drejt përmbysjes së monizmit të Edi Ramës. Kemi besim se ky entuziazëm ka një qëllim kryesor, shpëtimin e shoqërisë shqiptare nga ky monizëm i egër që po shfaros kombin. Sot çdo qytetar që hedh sytë përreth konstaton me dhimbje se 1/3 jonë nuk është më në Shqipëri. Brenda 8 viteve u larguan 937 mijë shqiptarë vetëm në hapësirën e BE. Humbëm 1/3 e kombit. Nga kjo e tretë, 80% janë në moshën nën 30-vjeçare”, deklaroi Berisha.
