Vendimi i marrë në mbledhjen e së enjtes nga KQZ për të mos pranuar kërkesën e Sali Berishës për regjistrimin në zgjedhje të kandidatëve të “Primareve” me logon e Partisë Demokratike, është ankimuar prej ish-kryeministrit.
Mësohet se Berisha e ka apeluar menjëherë vendimin në Komisionin e Ankesave dhe Sanksioneve (KAS).
Në kërkesën ankimore drejtuar KAS, ai ka kërkuar ndryshimin e vendimit duke vendosur “regjistrimin e PD të të përfaqësuar nga kryetari Sali Berisha si subjekt zgjedhor në zgjedhjet për organet e qeverisjes vendore të datës 14 maj 2023”
Në kërkesë theksohet se duhet të merret parasysh shkarkimi i Lulzim Bashës në Kuvendin e 11 dhjetorit si dhe dorëheqja e tij në Mars 2022.
Gjithashtu nga PD kërkohet të njihet zgjedhja e Sali Berishës si kryetar në referendumin e mbajtur nga Rithemelimi në maj të vitit 2022.
Lidhur me konstatimet e KQZ duke iu referuar vendimit të 3 marsit nga Gjykata e Apelit, Berisha e konsideron atë vendim jo të formës së prerë dhe thekson se në fuqi mbetet vendimi i Shkallës së Parë sa kohë çështja është në proces gjyqësor.
