Kreu i PD-së Sali Berisha, në një konferencë për gazetarët, tha se kjo do të jetë pranvera e ndryshimit të madh, pavarësisht emërimit të opozitës nga ana e kryeministrit Rama.
Kryetari demokrat përshëndeti nisjen e vrullshme të fushatës zgjedhore.
“Zhvillimi më pozitiv i shoqërisë shqiptare këto ditë ka qenë starti entuziast, i fuqishëm i fushatës elektorale të PD-së.
Ka qenë reagimi i fuqishëm i qytetarëve në mbarë vendin, ju e patë, Mallakastra dhe Lezha ishin në zenitin e besimit, në zenitin e reagimit, ndaj përpjekjeve primitive, ndaj përpjekjeve të pashembullta në 32 vite të Edi Ramës për të fituar zgjedhjet me fasadë-veglat e tij. Mund të them se ekziston një klimë e jashtëzakonshme.”- tha Berisha.
Berisha tha se kupa tani është derdhur dhe Ramën e pret fati i ish agjentit të FBI-së, Charles McGonigal, i cili përfundoi në burg.
“Rama sikur të mbledhë të gjithë bravat dhe Alibashët e Ballkanit është i pashpresë. Reagimi qytetar është i jashtëzakonshëm. Me të gjitha aktet e tij, vjedhjet e panumërta, qëndrimet anti demokratike, lidhjet me drogën, kupa u derdh me vendimin për të emëruar opozitën që dëshiron “Alibasha-Brava”. Me këtë start siguroj shqiptarët se kjo do të jetë pranvera e ndryshimit të madh. Ju e dini se veprimet e Edi Ramës ishin veprime in extremis, të një njeriu të tmerrua, që rryma po e çon drejt McGonigal dhe që përpiqet të kapet në fije bari si ‘brava’ dhe ‘alibasha’. Tjetër është morali i Ramës dhe pengjeve të tij, tjetër është morali i shqiptarëve”, tha Berisha.
