Në mbledhjen e kësaj të enjte në KQZ, institucioni ka pranuar kërkesën e Partisë Socialiste dhe Partisë së Lirisë për regjistrimin në zgjedhjet lokale të 14 majit dhe ka lënë të paqartë fatin e PD-së, teksa ka shqyrtuar dy kërkesat që vijnë nga Sali Berisha dhe grupi “Alibeaj”.
Teksa i referohej dy kërkesave, kryetari i KQZ, Ilirjan Celibashi theksoi se në perceptimin e tij Sali Berisha është kryetar i Partisë Demokratike, por ligji njeh Lulzim Bashën.
“Unë mund ta pranoj që në perceptimin tim Berisha është kryetar i PD-së, por nuk ndryshon asgjë në përputhje me ligjin pasi duhet të marr në konsideratë një dokument zyrtar të gjykatës. Të drejtën për të regjistruar PD-në, bazuar në dokumentet zyrtare që i janë vënë KQZ-së e ka Lulzim Basha. Ai figuron kryetar i PD-së”, tha Celibashi.
Ai gjithashtu nënvizoi se KQZ nuk ka të drejtë të vendos se kush ëhstë kreu i një subjekti politik pasi ai njihet me vendim të gjykatës. Celibashi u shpreh se do të përvënte një precedent të dëmshëm nëse Komisioni do të vendoste për regjistrimin në zgjedhje në bazë të perceptimeve personale.
“Nuk është KQZ që vendos se kush është përfaqësuesi i një partie politike, për aq kohë sa nuk është KQZ, këtë vendim e merr nga një palë e tretë. E ka përcaktuar ligji i partive politike dhe kodi zgjedhor, që përcakton se kush është organi që vendos për drejtimin e partive politike. Është gjykata, dhe një dokument që vjen prej gjykatës, përcakton se kush është drejtuesi i një partie politike. Kjo është e qartë për këdo dhe është e kotë që të vazhdojmë diskutimet.
Në nenin 9 të ligjit për partitë politike thuhet se regjistrimi i partive bëhet në shkallën e parë të rrethit Tiranë që mban edhe regjistrin e partive politike. Anëtarësia e një partie politike mund të njohin për drejtues të një partie këdo që ata çmojnë dhe vlerësojnë, por për ligjin dhe institucionet publike, përfshi edhe KQZ-në, ajo që merret në referencë është dokumenti zyrtar. Do të ishte shumë e dëmshme nëse KQZ do ta merrte këtë vendim bazuar mbi perceptime dhe fakte publike, për sa kohë që ekziston një dokument zyrtar që vërteton një fakt”, nënvizoi kreu i kQZ.
