Zhvillimet e orëve të fundit, ku përfaqësuesi ligjor i grupit “Alibeaj” me një dosje me dokumente ku binte në sy fakti se Lulzim Basha si kryetar i Partisë Demokratike autorizonte Enkelejd Alibeajn për të regjistruar subjektin zgjedhor në KQZ, kanë sjellë reagimin e ashpër të ish-kryeministrit Sali Berisha.
Kreu i demokratëve në një konferencë për shtyp nga selia blu iu përgjigj interesit të gazetarëve lidhur me regjistrimin në KQZ të grupit Basha-Alibeaj, duke e konsideruar dyshen në fjalë pengje të Edi Ramës.
“Pengjet janë pengje. Zbatojnë vetëm urdhra të pengmarrësit. Nuk ekziston fraksioni. Ekziston fraksioni i pengjeve të Edi Ramës, që përbëhet nga dy persona: Lul Brava dhe AliBasha. Kaq!”, tha Berisha.
Lideri i opozitës më tej u shpreh se vendimi i Gjykatës së Apelit për të dërguar për rigjykim në Shkallën e Parë çështjen e vulës së PD, vetëm sa ka shtuar entuziazmin e demokratëve për një fitore më të thellë në 14 maj.
“PD është një dhe vetëm një, është ajo e anëtarësisë, është ajo që ka mbështetjen masive te qytetarët shqiptarët, është ajo që ka vendimin e gjykatës së faktit për regjistrimin dhe nuk mund të goditet me asnjë mjet tjetër”, deklaroi Berisha.
Sipas tij “do jenë të mjerë ata, që do vazhdojnë si donkishotër betejën me ketë forcë që ka për energji dhe frymëzim lirinë”.
“Është e aftë t’i rezistojë çdo mafieje dhe e faktoi këtë. Kjo bën krenar çdo shqiptar, çdo njeri të lirë”, theksoi Berisha.
I pyetur se cili do jetë emri i koalicionit që përfshin Partinë e Lirisë dhe PBDNJ, me të cilin do garojnë kandidatët e dalë nga “Primaret” në këto zgjedhje, Berisha tha se gazetarët do e mësojnë sapo të vendoset.
