Partia Demokratike do të dalë nesër në protestën e radhës kombëtare për të kërkuar dorëheqjen e Edi Ramës poshtë zyrës së Kryeministrit, në të njëjtën kohë kur në Gjykatën e Apelit do të vendoset fati i “Vulës” së PD.
Teksa rreziku ekziston që PD të mos rregjistrohet në zgjedhje, por edhe që “Vula” t’i kalojë grupimit të Alibeajt, Berisha refuzoi ta komentonte çështjen e regjistrimit në zgjedhjet e 14 Majit teksa u pyet në “Opinion”, se çfarë do të ndodhë në rast se gjykata nuk do të marrë nesër një vendim.
Berisha u pyet se si do të vepronte në kushtet kur Partia e Lirisë ka çuar kërkesën për regjistrim në KQZ dhe Apeli mund të mos ia japë zyrtarisht “Vulën” e PD, Berisha tha se nuk ka ndër mend të bëjë asnjë formë presioni ndaj gjykatësve përpara seancën vendimtare.
“Nuk më shkon dhe nuk kam ndërmend që të bëj presion ndaj gjykatësve, nuk bëj asnjë koment, kam bindjen se në asnjë komb, ai që nuk është palë nuk mund të legjitimohet. Unë më tutje, nuk kam asnjë supozim për vendimin e gjykatësve”, u shpreh Berisha.
“Gjithçka e kemi me Edi Ramën, jo më gjykatën”, nënvizoi lideri i opozitëës, ndërkohë që bëri thirrje për pjesëmarrje masive në tubimin që do të nisë nesër nga ora 12:00.
Sipas tij revolucioni nuk ndalet nga vendimi i gjykatës dhe do të vijojë deri në largimin e qeverisë.
“Më madhështore, më të fuqishme. Nesër është sipari i revolucionit. Vazhdon revolucioni demokratik. Të jenë të bindur se nuk ka të ndalur deri në fitore. I bëj thirrje shqiptarëve që qindra e mijëra që kanë ardhur në Tiranë dhe po vijën dhe ata që janë në tiranë të bashkohemi”, nënvizoi kreu i PD.
Pjesë nga intervista:
Fevziu: Sot PL ka çuar kërkesën për t’u regjistruar. Nëse vendimi shtyhet ose i çohet Alibeajt çfarë do bëni ju?
Berisha: Nuk kam ndër mend të bëj asnjë formë presioni ndaj gjykatësve. Nuk bëj asnjë koment për vendimin e 3 gjykatësve. Kam bindjen absolute se në asnjë komb ai që nuk është palë në një proces nuk mund të legjitimohet.
Fevziu: Nëse gjykata e shtyn vendimin, çfarë do bëni?
Berisha: Nuk kam asnjë supozim për vendimin e nesërm të këtyre gjykatësve.
Fevziu: Rrezikoni të mos hyni në zgjedhje…
Berisha: Ashtu mendoi edhe Ramiz Alia në vitin 1991, por nuk shkoi ashtu. Ky është revolucion, që synon të përmbysë një monizëm.
