Elena Hysa, ish-bashkëjetuesja e Ramazan (Dan) Hutrës, ishte një nga objektivat që donte të ekzekutonte, por ajo mbeti e plagosur nga të shtënat me armë që 40-vjeçari zbrazi në banesën e prindërve të saj në Paskuqan.
Tre gra kanë mbetur të vrara ditën e djeshme nga Hutra dhe tre të tjera janë plagosur. Një prej viktimave ishte shtatzënë.
Kur Hutra ka mësuar nga policia se Elena ishte e plagosur ka thënë: “Po më ngel peng që nuk e vrava, pasi më ka tradhëtuar dhe ajo nuk pranonte të bënte ADN-në e fëmijës”.
Hutra ka treguar në detaje se si i kishte kryer krimet dhe motivet.
“Planin e kisha të përgatitur dhe kisha 4 objektivë për të vrarë. Në fillim doja të vrisja 40 vjeçaren në Astir, të cilën doja ta prisja në fyt, por u largua dhe në dyqan u futën njerëz të tjerë. Doja ta vrisja sepse më kishte 80 mijë euro borxh. Nuk doja ta qëlloja me armë sepse më pas nuk realizoja dot vrasjet e tjera. Më pas shkova në Kodër-Kamez, sepse doja të vrisja ish-vjehrrin, por duke qenë se nuk e gjeta më shtëpi, kam qëlluar ndaj grave. Pasi më mbaruan plumbat nxora thikën dhe sulmova me thikë.
Më pas kisha dy objektivë, vëllain e Vladimir Kurtit dhe një person tjetër që i ka dhënë pistoletën vrasësit të babait tim para 23 vitesh. Duke qenë se e kisha më afër dhe nuk kishte trafik shkova te shtëpia e Vladimir Kurtit. U futa në banesë dhe nuk gjeta njeri, po kërkoja vëllain e Vladimir Kurtit. Kur dola në oborr thirra: A ka njeri këtu? Dhe doli motra e tij. Qëllova ndaj saj, ndërsa ndaj nënës nuk qëllova vetë, sepse nuk doja ta vrisja. Vrasjen e bëra sepse kisha sherr me vëllain e saj në burg dhe e kisha paralajmëruar. Mora makinën dhe u largova drejt Sharrës dhe rrugës jam ndeshur me disa patrulla policie te cilat shkonin drejt vendngjarjeve. Kur arrita në Kodër po prisja ardhjen e objektivit tjetër. Pas kryerjes së vrasjes së 4 unë do dorëzohesha vetë dhe do shkoja në burg”,- është shprehur ai.
