Evdokija Cangli, pjesëmarrëse në reality show-n “Big Brother”, ka treguar për mediat greke momentet e tmerrit dhe si arriti të shpëtonte nga treni i vdekjes.
“Isha në vagonin e tretë, në të cilin ishte një vajzë tjetër me macen e saj. E shëtisnim lart e poshtë dhe luanim me të. Ne po qeshnim”, tha Cangli.
Në momentin e përplasjes ajo ka arritur të ulet në vendin e saj dhe ata që ndodheshin në korridor nuk kanë shpëtuar.
“Ndjeva që vagonët po ktheheshin dhe godita fort ballin dhe hundën në sipërfaqen e fortë. Vagoni mori flakë menjëherë dhe ndjeva se flokët më kishin marrë flakë”, thotë Cangli.
E reja tregoi se paniku është një fjalë shumë e vogël për të përshkruar atë që po ndodhte në atë moment.
“Ne po kërkonim një mënyrë për të dalë nga vagoni, gjetëm një dalje përmes rrënojave dhe më pas kuptuam se distanca që na ndante nga toka ishte e barabartë me lartësinë e katit të dytë të një pallati banimi. Më duhej të vendosja nëse do të digjesha apo do të thyeja kockat duke rënë nga ajo lartësi. Zgjodha të hidhesha, por u përpoqa të zvogëloja lartësinë time. U mbajta pas vagonit për aq kohë sa munda të mbaja, dhe pastaj hodha xhaketën në tokë për të rënë pak më butë. Fatkeqësisht rashë në një gur dhe theva legenin”, tha ajo.
Ajo rrëfen se për shkak të adrenalinës nuk ka ndier dhimbje dhe ka nisur të vrapojë me njerëzit e tjerë, të cilët ishin po ashtu të plagosur, duke mos ditur se ku po shkonte.
“Thjesht vrapuam dhe inkurajuam njëri-tjetrin, faleminderit Zotit që jemi gjallë”, përfundoi Cangli.
