Ditën e sotme në qytetin e Korçës është mbajtur Ceremoniali zyrtar i mirëseardhjes së Këshillit të Ministrave të Republikës së Kosovës, në kuadër të mbledhjes së përbashkët të dy qeverive.
Nga kjo mbledhje u nënshkruan 12 marrëveshje të përbashkëta nga qeveritë e Shqipërisë dhe Kosovës.
Përkatësishtë janë nënshkruar 4 marreveshje bashkepunimi per sigurimet shoqërore dhe integrimin dhe 8 memorandume për energjinë elektrike, diasporen, mjedisin, kulturën, për investimet e huaja mes AIDA KIESA, për certifikatat veterinare.
Në konferencën e përbashkët për shtyp, kryeministri Rama tha se këto marrëveshje bashkëpunimi synojnë zhvillimin e mëtejshëm të dy vendeve dhe integrimin e përbashkët në familjen europiane. Mes të tjerash ai iu përgjigj edhe presidentit serb të Bosnjës për deklaratat e tij në lidhje me Kosovën.
“Ballkani është i lirë, secili ka ëndrrat e veta. Ne nuk jemi këtu për të komentuar ëndrrat e të tjerëve”, tha Rama.
Ndërkaq, kryeministrat Rama dhe Haradinaj i janë shmangur pyetjeve në lidhje me situatat politike në Shqipëri dhe Kosovë.
Kryeministri Rama është pyetur mbi zgjedhjen e kryeprokurorit të ri në Shqipëri, ndërsa kryeministri Haradinaj për arrestimin e Albin Kurtit. Por të dy kryeministrat kanë shmangur përgjigjet, duke thënë se këto çështje nuk kanë qenë pjesë e diskutimeve dhe e axhendës së mbledhjes së përbashkët të qeverisë.
Në fjalën e tij, kryeministri Rama u ndal tek marrëveshjet e realizuara me qeverinë e Kosovës, dhe tek realizimi i tyre.
“Jam shumë i nderuar që sot ne kemi mysafirë në Korçë, kryeministrin Haradinaj dhe ministrat e tij. Dy qeveritë tona ritakohen pas pak më shumë se një viti, dhe pas tri mbledhjeve në radhë, të cilat kanë vënë themelet e qëndrueshme të një partneriteti strategjik, gjithëpërfshirës në një kudër të gjerë bashkëpunim. Mbledhja që sapo mbyllëm flet vetë për një bilanc arritjesh të rëndësishme dhe angazhimesh të rëndësishme, bazuar mbi sa kemi bërë deri më sot.
Ne kemi marrë këto angazhime mbi bindjen se ka ende shumë për të bërë, por edhe se mundësitë janë aty, dhe praktikisht që nga mbledhja e parë në Prizreni në vitin 2104 e kemi pasuruar këtë kuadër bashkëpunimi me disa pjesë të rëndësishme, ndërkohë që një pjesë e rëndësishme e kuadrit mbetet për t’u plotësuar. Me vjen mirë që të tërë hapat e ndërmarrë janë të mirë përcaktuar me një drejtim të përbashkët strategjik. Nuk dua të ndalem një për një në të gjitha marrëveshjet që sapo kemi nënshkruar, pasi janë transparente dhe mund t’i ktheheni për çdo rast”, u shpreh kryeministri Rama.
Pas përfundimit të mbledhjes mes dy qeverive asaj të Kosovës dhe asaj Shqiptare, dy krerët e qeverive përkatëse, Ramush Haradinaj dhe Edi Rama kanë firmosur për marreveshjet e diskutuara në këtë tryezë.
Kryeministri Rama dha edhe lajmin e mire se shumë shpejt pritet të hapet zyra operacionale e Kosovës në portin e Durrësit. Mes të tjerash Rama tha se qëllim i përbashkët është heqje e barrierave dhe e kostove doganore.
“Po punohet për hapje të tjera të linjave doganore mes dy vendeve. Pavarësisht kësaj, kemi ende punë për të bërë, për të reduktuar kohën që qytetarët të ulin kohën që kalojnë në kufi. Do vijojmë punën për hapjen e zyrës operacionale në Portin e Durrësit. Hapja e kësaj zyre do të lehtësojë dukshëm bashkëpunimet mes dy vendeve. Mallrat e Kosovës në pikën e Portit të Durrësit, nuk do të kalojë më asnjë pikë tjetër kufitare brenda vendit. Jemi angazhuar për të degëzuar gazsjellësin trans-adritaik për në Kosovë, dhe më pas në Rajon. Po ecën në bashkërendim të dy palëve, sa i takon projekteve infrastrukturore të dy vendeve. Ka një rritje të shtimit të interesit mes dy vendeve.
Rreth 920 biznese nga Shqipëria janë në Kosovë, ndërkohë që ka dhe në Shqipëri. Tregtia mbi vendet tona është 5-fishuar. Kjo është një shifër, e cila krahasuar me ambiciet tona është modeste. Viti aktual është viti i suksesshëm, por edhe një vit që konfirmon potencialin për t’u rritur në këtë aspekt.
Duke kaluar përtej shifrës prej 200 milionë eurosh. Importet nga Kosova në 9 muajt e parë arrinin nga 6 mld. Potenciali është tejet më i madh. Për këtë arsye të dyja qeveritë do të punojnë me këmbëngulje, që të kemi në të ardhme sasia edhe më të mëdha”, tha Rama.
