Vdekja e 22-vjeçares nga Kenia që u dhunua barbarisht dhe u hodh nga ballkoni i shtëpisë ku jetonte në Tiranë, vijon të jetë në qendër të hetuesve.
Burime nga grupi hetimor bëjnë me dije se është marrë në pyetje për herë të dytë, mikja e kenianes, Emily Mutua e cila ka dhënë disa detaje të reja për policinë, që mund të hedhin dritë në misterin e çështjes së Joy-t.
Aktualisht, hetuesit i konsiderojnë sekret hetimor deklarimet e Emily, të cilat do të verifikohen.
Kujtojmë se që prej 14 gushtit të vitit 2022 vajza nga Kenia u shtrua për kurim në spitalin e Traumës, pasi u dhunua brutalisht dhe u hodh nga kati i dytë i banesës ku jetonte në rrugën “Pandeli Evangjeli” në Tiranë, megjithëse ngjarja është ende e mbuluar me mister.
Deri më tani, askush nuk është arrestuar në lidhje me rastin, por policia pretendoi se ata janë në ndjekje të autorëve.
