Nga Boldnews.al
Tenderat po hanë “kokat” e krerëve të Postës Shqiptare, një institucion që xhiron dhjetëra miliona euro në muaj. Brenda një periudhe të shkurtër, janë ndryshuar 3 administratorë. Në detyrë është Ardit Demiri, i cili pasoi Anisa Kaltanjin, që edhe ajo pasoi ish-deputetin Ervin Bushati. Të gjithë militantë të thekur të Partisë Socialiste, të vendosur në atë pozicion për punësime dhe për të bërë “lekë”. Por, pasi qëndrojnë disa muaj, ata ia kalojnë stafetën të besuarit të radhës.
Burime nga Posta Shqiptare i thanë BoldNews.al se Ervin Bushati u shkarkua pikërisht për tenderët e shumtë të paracaktuar. Emërimi i tij erdhi si shenjë “kompensimi” për mos bërjen e tij deputet në zgjedhjet e përgjithshme, ndërsa haptazi bëri procedura të dyshimta. Ndërkohë që ia kaloi detyrën Anisa Kaltanjit, e besuara e kryetarit të Bashkisë së Tiranës Erion Veliajt.
Në kohën e Kaltanjit, Posta u vu shpeshherë nën akuzë për abuzime me vjedhjen e pensioneve dhe sërish bërjen e tenderëve. Komandimi i saj zgjati fare pak, pasi Administrator kësaj herë u emërua Ardit Demiri, i cili ishte drejtor i Filialit të Postës Shqiptare në Elbasan.
Duke parë pozicionin e fundit, burimet thanë se Demiri është një i besuar i Taulant Ballës. Madje, Demiri ka qenë në garë edhe për kreun e PS-së së Elbasanit. Të tre, janë militantë të thekur, të cilët të përbashkët kanë vetëm Postën, të cilën po e përdorin për qëllime partiake dhe politike.
Por si i bën tenderat Administratori i ri? BoldNews.al siguroi dokumentet e procedurës tenderuese me objekt “blerje internet-intranet, me afat për 2 vite”, me fond limit 60.000.000 lekë pa TVSH, ose në euro 524.705 euro, pa TVSH. Kriter i përzgjedhjes ishte oferta ekonomikisht më e favorshme, bazuar në çmim.
“Me anë të kësaj, ju informojmë se operatori ‘Abissnet’ ofroi 39.231.360 lekë. ‘Albanian Telecommunications Union’ ofroi 45.817.640 lekë. ‘Communication Progress’ & ‘One Albania’ ofruan 49.995.360 lekë” thuhet në dokumente. E fundit, ishte edhe oferta fituese. Diferenca nga oferta më e ulët në atë më të madhe është plot 100 mijë euro. Një shumë e konsiderueshme.
Ndërkohë, në këtë tender bëri ofertë edhe “Vodafone Albania” me vlerë 53.009.988. Por, si u s’kualifikuan ofertat që dhanë më pak! Posta shkruan se “Abissnet”-i i Koço Kokëdhimës u skualifikua se s’ka zyra në gjithë Shqipërinë.
“Mungojnë përshkrimi dhe skemat e rrjetit të ofruesit të shërbimit për çdo pikë” ishte një pikë e arsyet së skualifikimit, të cilat vijonin edhe me arsye të tjera, ku kryesorja ishte mbulimi me internet i gjithë vendit. Nga tenderi u skualifikua edhe oferta e firmës “Albanian Telecommunications Union” & “Digicom”. Arsyeja e skualifikimit ka qenë e njëjtë me ofertën e firmës së parë, s’ka pasur shtrirje në gjithë vendin.
Nga tenderi u skualifikua edhe “Vodafone Albania”, pasi letrat e saj ia kishte dhënë “Abissnet”-it. Pra, nga 4 firma në garë, 3 u skualifikuan, duke i hapur rrugë firmës ndoshta të preferuar të Demirit, apo edhe të eprorëve të tij në PS.
