Në një kohë që Bashkimi Evropian ndaloi me një ligj të posaçëm përdorimin e rrjetit social “Tik Tok” nga punonjësit e administratës në të 27 vendet anëtarë të unionit, duket se një masë e tillë është kërkuar të ndërmerret edhe në Shqipëri.
Këtë e ka bërë të ditur kryetari i Urdhrit të Punonjësve Socialë në vend, Mirgit Vata.
Në emisionin “Revieë”, Vata argumentoi disa aryse pse Tik-Tok është i dëmshëm, sidomos për adoleshentët, ku më e rëndësishmja është promovimi i gjuhës së dhunës dhe urrejtjes.
“Tik Tok-u, për mua është një ndër shqetësimet më serioze. Mua personalisht, gjatë eksperiencës sime të punës, me rastet që jam ndeshur te linja e këshillimit për fëmijë, unë kam qenë gjithë kohës në situatë alarmi, për aktualitetin që ndodhte, për tipologjinë e rasteve që ndodhin, për gjuhën e dhunës, urrejtjes, për nivelin e agresivitetit, për nivelin e diskriminimit, bullizmit, për të gjitha llojet e niveleve të dhunës, për adoleshentë dhe të rritur”, tha Vata.
Por, ai më tej zbuloi edhe detaje tronditëse sesi në Shqipëri janë kryer dy vetëvrasje vetëm për shkak të influencës nga ky rrjet social. Vata nënvizoi se një vit më parë, është bërë kërkesë në AMA për mbylljen e Tik-Tok, por ata nuk kanë marrë asnjë përgjigje nga ky institucion.
“Të gjitha ndodhin në Tik-Tok. Në Shqipëri, për shkak të Tik-Tok ke dy raste vetëvrasje adoleshentësh. Ne kemi bërë kërkesë, që Tik Tok të mbyllej në Shqipëri, para një viti më parë, te AMA”, theksoi Vata.
