Gjykata e Elbasanit ka vendosur të lejë në burg dy “besnikët” e Erion Alibejt, të cilët u arrestuan në fundjavë në lagjen “Emin Matraxhiu”, pasi më parë policia kishte gjetur në zonën e “ish-Konservimit” një automjet “BMW X6”, që kishte brenda 3 automatikë dhe dy shishe me benzinë.
Për Arsen Preçin gjykata ka caktuar masën e arrestit “Burg me afat”, masë e vendosur për 60 ditë, ndërsa për Arben Spahiun masa “Arrest me burg”.
Arben Spahiu akuzohet për veprat penale “Mbajtja pa leje dhe prodhimi i armëve, armëve shpërthyese dhe municionit”, “Falsifikimi i dokumenteve” dhe “Sigurimi i kushteve dhe mjeteve materiale për të kryer vrasje”.
Ndërkohë Arsen Preçi akuzohet për veprën penale “Mbajtja dhe prodhimi i armëve, armëve shpërthyese dhe municionit”.
Dyshimet janë që 53-vjeçari (i cili është i martuar me motrën e Erjon Alibej) do të godiste për hakmarrje, pasi ai është vëllai i Ardit Spahiut, i cili u vra në Belgjikë, por edhe i Rigers Spahiut, i kapur në tetor 2022 me një arsenal armësh në Elbasan.
Shënjestra e atentatit të grupit të Alibejt dyshohet se ishte Elton Kila, i njohur si “Oti i Elbasanit”.
Emri i tij doli ne drite pas arrestimeve në kuadër të operacionit “Plumbi i Artë”, me Nuredin Dumanin që rrëfeu se në vitin 2022 kishte marrë porosi për ta ekzekutuar, por kishte dështuar në ndjekjen e tij.
Elton (Kastriot) Kila, 43 vjeç i ka shpëtuar 4 herë deri më tani ekzekutimeve mafioze.
