Policia e Vlorës ka arrestuar një 32-vjeçar i cili akuzohet për veprat penale “Organizmi i lojërave të fatit në kundërshtim me ligjin”, “Fshehja e të ardhurave” dhe “Vënia në dispozicion e lokaleve për organizimin apo luajtjen e lotarive, lojërave të fatit apo bixhozit”.
Në pranga ka rënë shtetasi me iniciale L.Gj, i cili kishte përshtatur ambientet e lokalit që administronte, për organizimin e lojës së pokerit.
Gjithashtu uniformat blu bëjnë me dije se nën hetim është edhe një 40-vjeçar, i punësuar në lokal, pasi vinte baste me aparat celular. Sekuestrohen 1 tavolinë pokeri, çipsa dhe 1 aparat celular.
“Shërbimet e Komisariatit të Policisë Vlorë, në vijim të kontrolleve në lokale dhe në ambiente të tjera në të cilat mund të organizohen lojëra fati në kundërshtim me ligjin, kanë evidentuar dhe goditur 1 tjetër rast të kësaj veprimtarie të paligjshme, në kuadër të operacionit policor të koduar “Fati i lojërave”.
Gjatë kontrollit të ushtruar në lokalin në administrimin e shtetasit L. Gj., në lagjen “Bashkim”, shërbimet e Policisë kanë gjetur 1 tavolinë pokeri dhe 1 valixhe me çipsa, të cilat janë sekuestruar në cilësinë e provës materiale. Gjithashtu, gjatë kontrollit fizik ndaj shtetasit G. H., i punësuar në këtë lokal, atij iu gjet dhe iu sekuestrua 1 aparat celular, të cilën dyshohet se e përdorte për vënien e basteve. Në përfundim të veprimeve për këtë rast, u arrestua në flagrancë shtetasi L. Gj., 32 vjeç”, njofton policia.
Materialet i kaluan Prokurorisë, për veprime të mëtejshme.
