Ambasadorja e SHBA Yuri Kim ka reaguar për zgjedhjen e kryetares së re të Gjykatës Kushtetuese.
Ditën e djeshme, Holta Zaçaj u zgjodh me 5 vota në krye të Gjykatës Kushtetuese, vetëm në raundin e tretë, pas dështimit të dy raundeve të para më 15 dhe 17 shkurt.
Ajo ishte në garë së bashku me Fiona Papajorgjin dhe Marjana Seminin dhe ia doli të marrë kështu një mandat tre vjeçar në krye të institucionit.
24 orë pas zgjedhjes së saj në krye të Kushtetueses, Zaçaj ka marrë edhe një urim nga Ambasadorja e SHBA-ve në Tiranë, Yuri Kim.
Diplomatja e cila kishte heshtur, duke mos u prononcuar për mediat prej shpërthimit të skandalit McGonigal dhe duke ndalur postimet e zakonshme të saj në rrjetet sociale, këtë herë ka reaguar në Twitter, duke thënë se reforma në drejtësi nuk ka qenë e lehtë, por se ajo po ecën përpara.
“Urime Gjykatës Kushtetuese për zgjedhjen e kryetares së re. Holta Zaçaj është kryetarja e parë e zgjedhur qëkur Gjykata arriti të ketë trupë të plotë. I urojmë suksese asaj dhe të gjithë gjyqtarëve të tjerë teksa forcojnë integritetin dhe pavarësinë e Gjykatës”, shkruan Kim.
Më tej ambasadorja shton: “Reforma në drejtësi nuk ka qenë e lehtë, e shpejtë apo e përsosur, por po ecën përpara. SHBA do të vazhdojë të mbështesë fort zbatimin e plotë të reformës në drejtësi në Shqipëri”.
