Një ngjarje e pazakontë raportohet të ketë ndodhur në Sarandë.
Një pjesë e nxënësve të klasave të gjashta në shkollën “Adem Sheme”, kanë bojkotuar mësimin pasi pretencojnë se janë kërcënuar me thikë nga një bashkëmoshatar i tyre.
Sipas prindërve, një nxënës 14 vjeçar është kthyer në kërcënim për fëmijët e tyre.
Prindi: Kërkojmë nga ana e institucionit, drejtorisë së shkollës që fëmijët tanë të kenë siguri në shkollë. Jo më larg se mbrëmë ka pasur një incident të përsëritur edhe më parë. Ku një fëmijë në klasë paralele me fëmijët tanë, i ngelur disa herë në klasë, është bërë problem në shkollë. Mbrëmë në orën e pestë të mësimit, fëmija i quajtur Leo, ka hyrë me një mjet që fëmijët e kanë parë si pistoletë. Ia drejtoi mësueses dhe i tha duart lart. I ka mbajtur për një minutë ashtu në tmerr. Mësuesja është lidhur më pas me drejtoreshën.
Mësuesja, nga informacionet që kemi thotë që mos i bëni gjë sepse lodra i ka, s’janë të vërteta. Një javë më parë, i ka kërcënuar fëmijët me thikë. I ka mbajtur 45 minuta të izoluar në klasë. Asnjë nga shkolla nuk ka pyetur për këta fëmijë. Deri diku, fëmijët na i kanë mbajtur dhe të fshehtë.
Ky nuk ka qen rasti i parë që fëmijët e kësaj shkolle kanë frikë të hyjnë në mësim për shkak të kërcënimit dhe bullizmit. Por vetëm mëngjesin e sotëm, prindërit i janë drejtuar komisariatit të policisë për të gjetur zgjidhje.
Shkolla “Adem Sheme” është në rikonstruksion e sipër dhe nxënësit e saj janë transferuar në shkolla të tjera duke bërë mësim me nxënës më të mëdhenj.
Bojkotit të sotëm të mësimit nga fëmijët i janë bashkangjitur edhe disa mësues. Ndërsa prindërit thonë se nuk do t’i sjellin fëmijët e tyre në shkollë pa pasur siguri më të lartë.
