Fitorja me Kastriotin në frymën e fundit solli qetësinë te Tirana që reagoi menjëherë pas humbjes me Vllazninë në Klasiken e Shqipërisë. Bardheblutë kryesojnë kampionatin me 40 pikë, 3 më shumë se Partizani dhe 5 më shumë se Vllaznia por që prej dhjetorit ka munguar stabiliteti në rezultate.
Humbja e kryesimit në derbi, më pas shkëputja me gjashtë pikë sërish në krye dhe tani humbja me Vllazninë kanë treguar uljet dhe ngritjet e kampionëve në fuqi.
Presidenti Refik Halili ka kërkuar nga skuadra që në 5 ndeshjet e ardhshme të merren të paktën katër fitore. Duke filluar nga Teuta të shtunën, më pas me sfidën direkte në derbi dhe në vazhdim me Laçin, Bylisin dhe Erzenin, kryqytetasit kërkojnë të “vrasin” kampionatin.
Përballja në derbi, si zakonisht, është përcaktuese për sezonin e dy klubeve sidomos në këtë fazë ku ndodhet kampionati dhe një fitore e mundshme do të ishte një hap më pranë mbrojtjes së titullit kampion.
